Shalay galab, aniga oo maqaaxi ku sugaya saaxiibkay Cabdullaahi, baa agteyda waxaa isku waraystay laba nin oo iyana meesha fadhiyey. "War haye! Maxaa inoo kala dambeeyey? Reerkii see ahaa?". "War waa nabad. Gabadhiina waan furay, carruurtiina hooyaday baa haysa oo aan u geystay". "Oo maxaad u furtay gabadha?". "Ninyahow qaddar ALLE baa dhacday, masayr iyo wareer bay igala dhammaan weyday, anna waan u fududeeyey". "Haa, war sifiican baad yeeshay, la'iskuma baro naagaha jileecaas, bagah!".
Bal u fiirso! Ninkaasi waxaa la siiyey talo dhiirrigelinaysa in uu ku saxsanaa burburinta reerkiisii hore, reer dambe haddii uu yeeshana waxaa haystaa qodob dastuuri ah oo lagu qaado haweeney kasta oo masayrta.
La taliyaha noocaas ah waxaa uu noqon karaa aniga, adiga ama qof saaxiibkeen ah oo noo dhow, taladiisuna ay na saameyso, lagana yaabo in aannu go'aanno hore oo aan qaadannay uu nagula taliyey. Saaxiibkay Cabdiraxmaan oo xil culus loo magacaabay, ayaa waxaa uu ii sheegay in dadkii la taliyey nin kamid ah uu kula dardaarmay in guri uu ka dhisto meesha xilka inta uu hayo. Soo uma jeedid talada uu siiyey - Wax boob, wax dhac, wax ka qabso inta aad meesha joogtid - oo sarbeeb ah buu ku dhiirrigeliyey.
Lataliyeyaasha noocaas ah meel walba ayey joogaan, lagasoo billaabo madaxtooyada dalka laga hago, illaa xaafadeheenna. Waxa balaayo socota ee hantida ummadda ee la boobayo, reeraha guryohoodu dumayaan, labada isjecel ee kala dhimanaya, talada dadka noocaas ah ayaa u sabab ah. Si kale u ma garatide waa shaydaankii oo insi iskasoo dhigay, sida markii uu Nebi Aadam iyo Xaawo jannada kasoo saarayey uu lahaa:
فَوَسْوَسَ لَهُمَا الشَّيْطَانُ لِيُبْدِيَ لَهُمَا مَا وُورِيَ عَنْهُمَا مِن سَوْآتِهِمَا وَقَالَ مَا نَهَاكُمَا رَبُّكُمَا عَنْ هَٰذِهِ الشَّجَرَةِ إِلَّا أَن تَكُونَا مَلَكَيْنِ أَوْ تَكُونَا مِنَ الْخَالِدِينَ (20) وَقَاسَمَهُمَا إِنِّي لَكُمَا لَمِنَ النَّاصِحِينَ
Haddii aannu dhanka diinta eegno, aad ayey u tixgelisay la tashiga marka go'aan la qaadanayo. Go'aankaasi ha ahaado mid qaran, mid qoys iyo mid qofeedba. ALLE Sarreeyee waxaa uu quraankiisa ku yiri markii uu tilmaamayey duulka ALLE rumeeyey:
فَمَا أُوتِيتُم مِّن شَيْءٍ فَمَتَاعُ الْحَيَاةِ الدُّنْيَا ۖ وَمَا عِندَ اللَّهِ خَيْرٌ وَأَبْقَىٰ لِلَّذِينَ آمَنُوا وَعَلَىٰ رَبِّهِمْ يَتَوَكَّلُونَ(36) وَالَّذِينَ يَجْتَنِبُونَ كَبَائِرَ الْإِثْمِ وَالْفَوَاحِشَ وَإِذَا مَا غَضِبُوا هُمْ يَغْفِرُونَ (37) وَالَّذِينَ اسْتَجَابُوا لِرَبِّهِمْ وَأَقَامُوا الصَّلَاةَ وَأَمْرُهُمْ شُورَىٰ بَيْنَهُمْ وَمِمَّا رَزَقْنَاهُمْ يُنفِقُونَ
Waxa aan kusoo gunaanadi laba qodob oo aasaasi ah in aannu tixgelinno marka la joogo la tashiga, waxaana ay kala yihiin:
1. Haddii lagula tashto ogoow in aad ammaano culus dusha u ridatay. Sidaa awgeed, si xeel dheer uga fiirso waxa walaalkaa aad kula talinaysid, ogowna in aad kheyr badan talada aad bixisay sababi karto, sidoo kalena musiibo dal iyo dadba galaafata taladeeda in aad soo jeedin karto.
2. Haddii arrin ka go'aan gaarkeedu kula cuslaato, xulo cidda aad kala tashanaysid, hana ahaato ciddaasi dad ALLE kabaq u saaxiib ah, aqoon u leh waxa aad kala tashanaysid, aragti dheerna wax ku eegaya. Badi cidda aad kala tashanaysid, weydiina in uu kuu bayaamiyo dhibta iyo dheefta ka imaan karta haddii aad go'aan ku qaadatid taladiisa, maslaxadda ka dhalan kartaana ay tahay mid adduunkaaga iyo aakhiradaadaba anfac u leh.
Faafi
Comments
Post a Comment