Markii aan yaraa aad baan u jeclaa masaajidka in aan aado. Culimada, odayaasha, dhalinyarada masaajidka waxka barata baan jeclaa in aan dhex fariisto, waxaan jeclaa in aan mar un addimo ama imaam aan noqdo. Marka la aqimo waxaan isku dayi jiray in aan safka hore marwalba ku jiro, waliba in aan Shiikha masaajidka kutubta ka akhriya dhiniciisa ku tukado, waxaan jeclaa in maalin un sidiisa noqdo oo dadka oo dhami ay dhagaystaan casharrada aan bixiyo.
Nasiib darro! Waxaa jiray oday masaajidka ku tukada. Markasta waxaa uu aad ula diriri jiray carruurta sidayda oo kale masaajidka jooga. Marka uu na arko wajiga ayuu noo kuduudi jiray, wiil yar oo masaajidka dhaq-dhaqaaqa haddii uu arko inta soo boodo ayuu dhihi jiray "Waryaa! Waryaa! Bax soco, ka bax masaajidka:( ". Markasta oo aan odaygaa arko, waxaan illaawi jiray in aan noqdo mu'addin, imaam, shiikh ama arday kamida ardayda kutubta ka raacda masaajidka.
Habeenkii iigu dambeysay ee aan masaajidka aado, waan xusuustaa, salaadda markii la aqimi rabay, ayaan waxaan arkay boos safka hore ka bannaan. Inta orday ayaan jag isku siiyey, aad baan u faraxsanaa in aan caaway booskaa ku tukan doono. Xooga kadib waxaan maqlaa suul-dhabaale, gadaal baan eegay mise waa odaygii oo aad wajigiisa moodid in aan aabihiis dilay, cadaawadda iyo nacaybka ka muuqday wali waan xusuustaa, "Waryaa Bax! Bax!...". Waxaan dareemay bah-dil, waxaan dareemay ceeb, waxaa iigu darnayd in cidina aysan iga celin oo yax-yax iyo calool xumo anoo la qarxi raba aan masaajidkii kasoo baxay. Tan iyo habeenkaas masaajidka iyo aniga waxaa na dhex-taagan odaygii naxariista darnaa ee carruurta necbaa.
Ujeeddo!
Sheekadaan waxaa igu dhaliyey in aan allifo, kadib markii aan arkay dhaqanka cadaawadda ah ee carruurta masaajidda timaadda lagula dhaqmo. Suubbeneheennu wuxuu yiri NNKH "Nagama mid aha kan aanan u dhimrin carruurteenna, waayeelkeenana aanan xaq dhowrin". Ilmo yar oo aad cibaadada ku dhiirrigelisaa, masaajidkana jecleysiisaa, waxaad ku mutaysan kartaa in ALLE kaaga abaaliyo cibaadada uu noloshiisa oo dhan cibaadaysan doono, halka qof awgaa cibaadada u naca aad qeyb ku yeelan doonto xumaanta uu falo.
📸 From Google
Comments
Post a Comment