Wiil yar oo aan dhalay baa aad caloosha looga qabtay, kadibna waxaan geeyey dhakhtar. Baaritaan kadib waxaa uu u qoray daawo, kadibna iisoo celi ayuu yiri dakhtarkii. Dawaadii sidaan ugu waday ayeyna dhammaatay, waxbana kama aysan bedelin xanuunkii. Dhaktarkii baan ku celiyey, waxaana uu ii sheegay in daawada dalka taal tahay mid tayo hooseysa. Sidaa waxaa yiri saaxiibkay Xuseen oo aan galabtay wada casariyeynay. Oday kale oo isna nala fadhiyey ayaa wuxuu noo sheegay in dhakhtarkaasi qiray daawada tayada leh ganacsatadu aysan iibin sababo la xiriira qiimeheeda oo badan iyo ganacsatada oo aanan iyana xil iska saarin tayada.
Habeen dhexdaas ah oo aan booqday Isbitaalka weyn, waxaa bukaankii aan u tagay agtiisa laga qaaday wiil ay dhaleen dad dan-yar ah kaas oo gaari ka dhacay, kadibna madaxa dhulka si xun ugu dhufsaday, xaaladdiisuna ay aad u xuntahay, sababta meesha looga qaaday ayaa ahayd in aysan joogin dhakhaatiir waxka qaban karta xaaladdiisa, sariirta uu jiifana lacag badan looga qaadayo habeen kasta. Sidaa awgeed reerkiisii ay go'aansadeen intii uu meesha ku dhiman lahaa daaweyn la'aan iyo kharash badni, ay door bidayaan inuu guriga u yaallo oo halkaa uu melegga ku sugo. Waxaa caadi iska noqotay iyana in dadkeennu u dhimanayaan dhiig-bax, oxygen la'aan, ummul-raac iyo waxyaabo aasaasi ah oo caafimaadka la xiriira.
Wareerku caafimaadka keliya kama jiro, suuqyada haddii aad tagto, kasoo heli maysid hal wax shay oo tayo leh oo dalka la keeno. Dharka, cunnada, daawada, kabaha, dhammaan waa qashin loosoo raro dalka, ayna noo keenaan ganacsato damiir beelay, aanan haysanna dowlad Yac! tiraahda, iskaba daa in la helo cid ALLE ka cabsada ku tiraada, ganacsatadu waa ehlu salaad, safka hore aanan laga waayin, sadaqadana kumannaan bixiya. Waaba dadka ugu fiican bulshada!!
Gabar aannu macaariif nahay oo joogta dalka Hindiya ayaa maalin dhexdaas ah si adag iiga digtay cunidda raashinka sijillaateysan ee dibedda laga keeno, waxaana ay ii sheegtay in dadka ugu badan ee cudurka Kansarka laga helo ay ka yimaadaan Puntland. Sidoo kale isla saaxiibkay oo reer Muqdisho ah ayaa iweydiiyey sababta dadka reer Puntland cudurka Kansarku ugu badanyahay.
Koobkii adduunka ee lagu qabtay dalka Baraaziil 2014 ayaa dhammaan gegi kasta oo diyaaradeed lagu qoray halku dhig ahaa "Fadlan haku xanuunsanin Baraaziil, sababtoo ah ma hayno caafimaad tayo leh". Dadkaas waa loo digay, innagu cid inoo digta ma haysanno.
Xaalka Puntland marka aan sawirray waxaa uu la midyahay qof baaskiil buur dhaladeed inta la fuulay, kadibna indhaha iska xiray, gacmahana sii daystay raba inuu buurta korkeeda bed-qab ku maro. Qofka ku nool Puntland waxaa uu ku xukumanyahay dil, waxaana dilaya waxkasta oo noloshiisa ku geedaaman, biyaha, cunnada, daawada, jidadka, adeegyada caafimaadka, iwm.
War maleh bur-burka dhaqaalaha, siyaasadda, xasillooni-darrada kusii baahaysa dalka. Waxaannu noqonnay sida qof sakaraad ah oo inta sifiican u lebistay isagoo dikaamaya qaadaya heestii ahayd "Ku dayoo Puntland ku dayoo!".
Intaas waxaa ka daran, ka xanuun badan, ka rajo-beel weyn iyadoo ay soo dhawdahay doorashadii madaxtinimo ee Puntland in dadkii la rabay inay u damqadaan ummadaan baaba'aysa ayba kala hororsanayaan xildoonka siyaasadda u hanqal taagaya, aysanna jirin cid leh! War see wax naga noqdeen? War xaggee u soconnaa? War maxaa xal noo ah? War dadkeenna maxaa ay ku suganyihiin?
"War toloow, maxaa idin baraarujin kara oo ka weyn inta balaayo aan soo sheegnay?".
Faafi
Comments
Post a Comment