Ninka maaskaraatiga xiran ee sawirka ka muuqdaa waxaa uu ka mid ahaa maxaabiis lagu tijaabiyey daawo cusub, badankood maxaabiistii waxaa ay u dhinteen suntii daawada, marka laga reebo isaga oo aanan sunta u dhiman, balse jirkiisii oo dhan wuu is bedelay, waana tan keentay in uu jirkiisa oo idil uu qariyo, xitaa wajigga. Inta uu ku jiray xabsiga ayuu isu dhisay maskax ahaan iyo jir ahaan, waxaana uu go'aansaday in uu sameeyo kacdoon ka dhan ah dowladdii sidaa u gashay oo ahayd kaligii talis, taas oo aanan wax xorriyad ah u ogoleyn dadkeeda. Waxaa uu samaystay shakhsiyad la magac baxday xarafka "V", waxaana uu diyaariyey qorshe uu ku sameeyo kacdoon weyn.
Maalin qaranku xuso oo ku aaddan 5ta November ayuu si xoog ah ku qabsaday TV-ga dalka dhan laga daawado si uu farriintiisa ugu gudbiyo shacabka, waxaana ay ahayd sidan:
"Galab wanaagsan, Marka 1aad ka raalli ahaada arbushka aan idinlasoo galay, sidiinna oo kale laftigaygu waxaan jeclahay nolosha maalinlaha ah ee iska deggen misana soo noq-noqota. Balse dareenka xusuusta maalmaha qiimaha leh sida kuwa halgammada culus ama xuska qof qiima badnaa, maalin damaashaad iyo farxadeed baannu ku sunti karnaa maantay oo ay tahay 5ta November, maalin aynu nasiib darradeenna illownay qiimaha ay lahayd, innagoo wakhti kamida maalinkeenna siinayna si aannu uwada fariisanno, kadibna aan isu waraysanno. Dabcan waxaa jira kuwo raba inaynaan hadlin.
Xitaa imika oo aan idinla hadlayo, ammaro ayaa telefoonka laga bixinayaa, kadibna ciidan qoryo ku hubaysan baa nalasoo diraa. Sabab? Halkii nala waraysan lahaa, qaarta booliska ayaa ka horreysa, Ereyadu marwalba awooddoodu way jirtaa, waxayna sababaan macnaha, kuwa dhagaystaa ku dhawaaqidda runta. Runtuna waxay tahay in dalkani wax weyn ka khaldanyihiin, miyeysan ahayn sidaa? Xadgudubka, cadaalad-darrada, afjabiska, dulmiga.
Halkii aad horay xaq ugu lahayd inaad wax diiddid, inaad sida aad rabtid u fekertid ama u cabbirtid, imika waa lagula socdaa, kaamirooyin baa ku daawanaya hubinaya isdhiibiddaada iyo mudiicnimadaada. Sidee bay waxani u dheceen? Yaa eedda leh? Hagaag! Xaqiiqdii masuuliyadda weyn waxaa leh oo lagala xisaabtamayaa marka aannu runta isu sheegno, haddii aad doonayso dambiilaha dhabta ah, kaliya waxaad u baahantahay inaad muraayadda isku eegtid.
Waan ogahay sababta kugu dhalisay. Waan ogahay waad baqaysay. Dagaallada, argagaxa, xanuunnada. Waxaa jira dhibaatooyin tiro badan oo lagu jeediyey maskaxdaada. Baqdin baa ku bannaysatay, fulaynimadaadu waxay kuu addoomisay hoggaamiyaha dalka, waxaa uu ballan qaaday kala dambeyn, waxaa uu ballan qaaday nabadgelyo, wixii uu ballan qaaday oo dhanna waxay ahayd un in adiga lagu aamusiyo, mudiicna aad u noqotid ballan-qaadayadiisa. Xalay waxaa ii muuqatay in aamuskaasi dhammaaday. Xalay waxaan gubay Maxkamaddii dambiyada ee qadiimiga ahayd, si aan u xusuusiyo dalkan wax uu illaaway.
400 oo sano ka hor muwaadin qiime badan ayaa noo asteeyey taariikhda 5ta november inay ahaato xusuus maankeenna ku raagta. Waxaa uu rajaynayey in uu dunida xusuusiyo sinnaanta, cadaaladda, iyo xornimadu inay yihiin wax ereyo ka weyn, in ay yihiin aragti iyo mabaadi'. Hadaba haddii aysan waxba kuu muuqan, dambiyada dowladdani geleyso aad ka indho xirantahay, 5ta November hakuu ahaato maalin iska caadi ah oo aanan micno ku fadhin. Balse haddii aad aragtid waxa aan arko, haddii aad dareemeysid waxa aan dareemayo, haddii aad raadinaysid waxa aan raadinayo, Waxaan kaa codsanayaa inaad isoo garab istaagtid, hal sano kadib caawa oo kale, dibedda albaabka baarlamaanka, kadibna aannu dib wada calaamadinno november 5teeda habeen aanan la illaawin".
Farriintan ayaa waxaa ay ku jirta filinka V for Vendetta oo la sameeyey 2005, kaas oo kamid ah top 200 Bogga IMDB.com ee qiimeeya aflaamta, isagoo haysta 8.2/10 dhibcood, waxaana u codeeyey dadk gaaraya 924,153 oo qof.
Gunaanad
Ma waxaan sugaynaa in uu noosoo boxo shakhsi lamid ah Mr. V, kaas oo TV-yada iyo Facebook-yada farriimo noosoo dhiga si aan 8da January isugu tagno bannaanka xarunta baarlamaanka Puntland oo aannu baarlamaanka cusub ku cadaadinno inaysan Puntland iibsan? Maxaa naga hortaagan imikaba in qofwalba uu telefoon u diro nabadoonkiisa iyo isinkiisa kadibna uu ku dhaariyo in uu soo xulayo xildhibaan xalaal ah oo aanan lasoo xaalufin, si uusan xildhibaankaasu berri dalka isna u xaalufin.
Maanta doorashadii waxaa ka harsan 57 maalmood, badanaa xildhibaannadiina lamasoo xulin, haddii nabadoonka iyo isinka beeshiinna aad isku magaalo joogtaan soo booqo, haddii uu kaa fogyahana telefoon u dir, adigoo aanan hebel inoo doora dhihin, beeshu waa is taqaane nin beesha oo dhan ceeb iyo xaaraan cun usoo jiida inaka ilaaliya kula ballan. Ogoow xildhibaannada laaluushka qaata naftooda, beelohooda, iyo deegaannadooda in ay u soo jiidayaan inkaar iyo halaag.
Halaagga ugu daran waxaa uu ku dhacayaa waa adiga, waxaana kuu keenaya aamuska aad ka aamustay maalin aad ka hadli kartay shakhsiga meteli doona aayahaaga 5ta sano ee soo socota. Aannu dhammaantayo lasoo baxno telefoonnada, kadibna aannu dirno farriin adag oo isbedel wanaagsan horseedda.
Faafi
Comments
Post a Comment