Saaxiibkay Abdi ayaa igasoo wacay messenger-ka Facebook, salaan iyo xog-waraysi kadib, waxaana uu ii sheegay in uu ereyada qaar ee Soomaaliga ah illaawayo, markii aan weydiiyey sababta ayuu ii sheegay in lagu sameeyey qalliin dhanka maskaxda ah oo lagasoo saaray buro ku taallay maskaxda. Xaaladda illowshaha ah ayaa caadi iska ah marka qofku maskaxda laga qalo, waxaana uu iigu bishaareeyey in uu maalmo kadib marka uu bogsado, caadigiisii ku noqon doono. Abdi ayaa kamid ah dhalinyarada ka tahriibtay Puntland sanadkii 2014, isagoo safar dheer oo silic iyo saxariir leh u maray in uu ku galo Yurub.
Saaxiibkay Cabdullaahi ayaa isna ii sheegay in uu walaalkiis oo dhaawac ah ku geeriyooday isagoo dhabtiisa ku haya, waxaa uu iisheegay xitaa inuu waayey kalkaalin sifiican u gacan qabata dhaawaca, iska daa in uu helo dhakhtar badbaadiya Cabdullaahi Walaalkiis.
Dhawaan ayey ahayd markii nin dhalinyaro ah Gaalkacayo ugu geeriyooday naqas (Oxgyen) la'aan, oo ah waxa ugu hooseeya ee la rabo goob kasta oo caafimaad in uu bukaanku u helo si deg-deg ah.
Saaxiibkay Saleebaan oo aan wada soconnay ayaa isaguna waxaa uu itusay gabar yar oo uu ii sheegay in habaryartii oo uu aad u jeclaa ay ku ummul raacday. Aniga qudhayda waxaa dhawaan geeriyootay ina adeertay oo u dunida uga tagtay todobo carruur ah oo ay ku jirto gabadhii ugu yarayd oo umusheedii xanuunkii ay kala kulantay dayac ugu geeriyootay dalka gudihiisa.
Waxaan isweydiiyey, idinna idin weydiiyey "Armay tahriibayaashu talada heleen?". Tolow! Haddii saaxiibkay Cabdi dalka sii joogi lahaa, buradaas madaxa uga jirtay, sow uma dhinteen?.
Waa ayaan darro, waa rejo beel, waa quus in maantay oo dunida ka gudubtay in gacan wax lagu daweeyo, lana adeegsanayo Artficial Intelligence(AI), qofkaba aanan gacan la saareyn, computers casri ah ay shaqadii qabanayaan, in dadkeennii u le'anayaan asaasiyaadka caafimaadka.
Isinka, nabadoonka, aqoonyahanka, wadaadka, ganacsadaha, dhalinyarada leh rag iyo dumar ee aad adiga iyo aniguba ka midka nahay, inta aynaan murashax hebel qiiro qabiil ku dhisan ama qoondo naloo qariyey ama qof aan jidbo ku raacnay lasoo gariirin, aannu saddex su'aalood bes ah isweydiinno:
1. Qofkan na leh waan idin hoggaaminayaa/idin meteleyaa, ma yahay qof tiisa ka adkaaday, noloshiisa horumar mugleh u gaarsiiyey, isku filan, aanan ahaynna nin boorso maran la wata?
2. Xaggee noo wadaa,qorse cad oo qoran dalka ma u hayaa?
3. Inta aysan cod iyo kalsooni uusan na weydiisan, qof wax ku ool ahaa oo kheyrkiisa la arki jiray ma ahaa?
Weydiimahaan fudud ee aasaasiga ah ayaa nooga filan inaan ku ogaanno qofka nala soo hor istaaga idoorta.
War iyo dhammaantii...
Puntland shanta sano ee soo socota marka la eego sida xaalkeedu yahay, marka la eego waxa hareereheeda ka socda, marka la eego Soomaaliya halka ay u jihaysatay ... ma geli karto Puntland shan sano oo tijaabo ah, uma baahna sidii Yuhuuddu ku tiri Nabi Muuse (CS) "Adiga iyo ALLAHAA dagaallama, annago bartaan baan fadhinaynaa" ~ Maa'idda, 24, ee waxaa ay u baahantahay inaannu saqiir illaa kabiir ka midaysnaanno inaannu Puntland uwada istaagno. Madaxweynihii Maraykanka John F. Kennedy markii dalkiisu dayax-gacmeedkii 1aad samada u dirayeen, ayuu soo booqday xaruntii NASA, waxaa uu la kulmay nin ka tirsan nadaafadda, wuxuu weydiiyey "Adigu maxay tahay shaqadaadu?", waxaa uu siiyey jawaab taariikhda gashay "Shaqadaydu waa inaan ka qeyb qaato in dayax-gacmeed dalkaygu samada u diro, aniga oo khuburada shaqada haysa u diyaarinaya meel nadiif ah oo shaqadooda si raaxo leh ugu gutaan".
Waxaa inoo ballan ah "Bar-barka ay ka baxdo waa bakeyle galeen".
W/Q Cabdullaahi Bootaan
Comments
Post a Comment