Rashed oo soo koobay doorashadii maantay dhacday, waxaa uu yiri "Puntland CV ayaa shaqaynaya, Doorasho Xalaala". Hoggaanka cusub dhammaantii waxaa ay ahaayeen rag lagu xushay tayo, waayo-aragnimo, aqoon la xiriirta sharciga iyo sooyaal wanaagsan, marka loo eego raggii la tartamayey. Dhanka kale jawiga tartanku waxaa uu ahaa mid deggen, sharqan iyo sawaxan yar, waxaana uu ka tarjumayey dowladnimada Puntland ee 20 sano jirsatay.
Farriintii 1aad ee maantay baarlamaanku diray waxaa ay ahayd in doorashada madaxtinimadu ay noqon doonto mid isbedel ku dhisan, isbedelkaas oo u badan mid lagu dhisi doono tayo, aqoon iyo waayo aragnimo.
Farriinta 2aad uu goluhu diray waxaa ay ahayd in murashax kasta oo ku tiirsan awoodo kale oo saameyn leh uusan ka gadmi doonin golahan, ayna meesha ka bixi doonto murashax hebel oo qolo hebel ay riixayso cidna ma hor istaagi doonto.
Farriintii 3aad waxaa ay ahayd in waxwalba la filan karo, ayna jirto awood isku xiran, taas oo u eg in ay tahay awoodda qiimeynta dhabta ah u haysa golaha shacabka, gaashaan-buurtan ayaa u eg mid leh macaayiir qarsoon oo ay ku qiimeynayaan murashax kasta oo isasoo hortaaga.
Farriintii 4aad oo ay direen waxaa ay ahayd in goluhu meesha ka saaray awooddii dhaqaalaha, taas oo dhabar-jab ku ah murashax kasta oo talo-saarta farta iyo suulka 💰, Puntland ay maantay yeelatay gole aanan dhaqaalaha keliya wax ku qiimeyn.
Waxaan rajaynayaa in goluhu sii adkeeyo qiimeynta uu ku samaynayo cidda rabta hoggaaminta shacabka Puntland. Soomaaliya maantay waxaa ay cagta saartay jidkii horumarka, duniduna si ka duwan sidii hore ayey ula dhaqmaysaa dalka, waxaana isasoo jiiraya dowladaha danaynaya wax la qeybsiga Soomaaliya.
Puntland oo ku taal mandiqadda ugu istiraatijisan Soomaaliya, waxaa ay u baahantahay dowlad iyo baarlamaan xisaabtama, hoggaan aragti fog leh, howlkarnimo usaaxiib ah, leh soo yaal wanaagsan, hal'adayg uu ku taabba-geliyo dowlad hal'beeg u noqota horumarka, dowlad-wanaagga, furfurnaanta, isla xisaabtanka, dowlad u horseedda in ay Puntland noqoto albaabka lagasoo galo Afrika, waana ku kalsoonahay goleheenna shacabka oo ay ka buuxaan qaar kamid ah ragga ugu aragtida fog, ugu hanka sarreeya, ugu hal'abuurka badnaa Puntland.
Waxaan golaha kula dar-daarmayaa in aysan marna ka tanaassulin dadnimadooda, waa in ay xusuusnaadaan in dalku iyaga bes sugayo, mustaqbalkuna uu noqon doono hadba sida ay wax u meel mariyaan.
ALLAHA inawada guuleeyo.
Faafi
Comments
Post a Comment