Intii uusan noqon madaxweynihii 1aad ee madow ah ee hoggamiya quwadda dunida ugu weyn (Maraykanka) ayaa waxaa la sheegaa in Barack Obama maalin uu shiriyey qoyskiisa, waxaana uu ugu khudbadeeyey in uu noqon doono madaxweynaha Maraykanka. Sheeko lagu qoslo ayey ka dhigteen badanaa dadkii meesha joogay, inyar baa se ku raacday suuro galnimada himiladaa weyn.
Waynnu kawada dheregsannahay in Obama uu himiladiisii ka dhabeeyey uuna noqday madaxweynihii ugu horreeyey ee madow ah oo jagadaas laba-xilli doorasho ku guulaystay.
Haddii aan u soo noqonno fahanka sirta guusha Obama iyo qof kasta oo himilo lahaa misana ku guulaystay, waxaa jirta saddex qodob oo u ah aasaas xaqiijinta yool walba, waxaana ay kala yihiin:
1. Doonis: waxaana aan ku micneyn karnaa rabitaanka dhabta ah ee qofka ku riixa in uu yool xaqiijiyo, rabtaankaas oo hurdada ka salaliya, cunnada ka soomiya, wax aanan yoolkaa ahaynna ka sahwisiiya.
2. Uhowlgal: doonistaa xooggani keligeed waxba ma hirgelin karto, waa in shaqo adag oo sugan ay timaaddaa, shaqadaas oo aad si dhab ah ugudatid adiga oo hubinaya in biyo kama dhibcaan aad kaga dhigtay, waxaa ay tahay tiirka 2aad ahna kan ugu muhiimsan marka laga hadlayo xaqiijinta yool kasta.
3. Rumaysi: dad badan baa labada qodob ee hore si dhab ah ugasoo baxa, balse waxaa jira quraafaad badan oo ay horay u aaminsanaayeen, taas oo keenta baaseysi iyo rejo-xumo fashilisa guusha, gaar ahaan marka ay soo dhawdahay. Rumaysnaantu waxaa ay ku siinaysaa awood ah in aadan niyad jabin, waxkasta oo kaa horyimaadana aad jiirto.
Markasta oo ay is waafaqaan sadexdan qodob guushu waa mid hubanti ah, wixii aanse calaf gelin xisaabta kuma jirto. ALLE sarreeyee waxaa uu quraankiisa ku yiri:
"ومن أراد الأخرة وسعي لها سعيها وهو مؤمن فأولئك كان سعيهم مشكورا".
"Qofkii doonistkiisu tahay maalinka dambe, una howlgala howlgalkeeda isaga oo rumaysan, kuwaas dedaalkoodu wuxuu ahaanayaa mid la mahdiyo".
Ku guuleysta idinkoo taabbagelinaya saddex-xagalkan adduun iyo aakhiraba.
W/Q Abdallah Botan
Comments
Post a Comment