Wax cid gaar ah aan ku maqlay ma jirto, balse sooryada (Laaluushka) wax qarsoon maaha, saas oo ay tahay waxyaabo isbar-bar dhig u mudan aan iftiinsho.
Waxaa bishaaro ah in baarlamaankeennu cusubyahay oo illaa 49 xubnood ay yihiin xubno aanan soo noqon, waxaa kale oo bishaaro ah in dhalinyaro xul ah oo aqoonyahan miiran ahi meesha inoo fadhiyaan. Horta booyaaloow ALLE idinkuma ceebeeyo darajada... Aamiin.
Xildhibaane, waad xusuusataa maalmihii waxbarashada, maalmaha imtixaanka iyo maaddooyinka adag ee u baahan diyaariska badan iyo soojeedka, la kaashigii saaxiibkaa, yarkii maaddadaas ku fiicnaa aad la u tagi jirtay, kula diyaarin jiray imtixaanka, waad garanaysaa xifdiga, layliga, iska dhagaysiga, waad garanaysaa subaxdii imtixaanka iyo waraaqihii aad kusoo koobtay nuxurkii maaddadii aad kusoo indha-madoobaatay, wadna kur-kur badanaa! Hayaay, waaba iyadii oo fasalka lagalay, waraaqihii imtixaankaas la qeybiyey.. Mise waaba fudayd, AlxamduliLAAH! Hal mar sida roob ma hiigaan ah aad warqaddii jawaabaha aad ku shubtay, adiga oo shafka taagaya, kalsooni, sharaf, dhadhansi macaanka miraha dadaalka adoo muudsanay aad soo baxday, saaxiibbadaa - Raggii aanan waxba soo diyaarsan - oo diiqad la tiicaya, meheraddii shaaha ay kulasoo fariisteen. "Saaxiiboow su'aal hebel kawarran maxaad ka dhigtay? Tii kale ee lambarkaas ahayd maxaad ku buuxisay? Tii xisaabta ahayd maxaa kuusoo baxay?", Adiga oo si weyn isugu kalsoon, wa adigii jawaabaha u tiriyey, halka iyagu ay shallayto, gunnimo iyo kalsooni darro ay kala huleeleen, maalinkii la'is abaal marinayey, adiguna aad abaal marinta qaadatay oo waalidkaa iyo ehelkaagaba ay kuu hambalyeeyeen.
Waa isla imtixaankii un, xildhibaane codkaagu waa sida jawaabihii, su'aaluhuna waa murashixiinta isasoo sharraxay, haddii aad si dedaal iyo xilkasnimo leh aad u bixisid, adigoo qiimeynaya qofka aad u dooraysid ummada reer Puntland, adigoo soo baaraya murashax kasta waxa uu yahay, kartidiisa, aqoontiisa, garashadiisa, waayo-aragnimadiisa, ammaanadiisa, aragtidiisa, adiga oo ka xor ah kooxaysi, gobolaysi, beeleysi, jeeb-gelis iyo waxkasta oo kaa indha-saabi kara in aad qiimeyn dhab ah ku samaysid cidda mudan codkaaga inay hesho, waxaa hubaal ah in aad heli doontid jawaabta saxda ah ee imtixaanka, codkaaguna uu noqon doono mid saameyntiisu maqaamkaaga sarreysiisa, kaana dhigta xildhibaan ku gor-gortama codkiisa, balse aanan noqon xildhibaan la gor-goriyo codkiisa.
Xildhibaane, Ka raalli ahow waan kugu badiyey hadalka, balse waxaa iga hadlinaya maantay Puntland oo dhan in ay adiga marti kuu tahay in aan ku dareensiiyo, xildhibaan ahow mid noo maqan, waligaa ha noqon mid nagusoo maqan, dadku waaku sugayaa, wax aanan la saluugin baa lagaa sugayaa ee sidaa ula soco.
Faafi
Comments
Post a Comment