Axmed waa 15 jir, dhigta dugsiga sare, hooyadii iyo aabihii ayuu la noolyahay. Asxaabtiisu kala bar waa ciyaalka xaafadaha isu laaya, inta kalena waa kuwa habeenkii dadka baarta, macallinka wax bara maadadiisa wax dhaafsiisan ma baro, marka uu guriga ku laabtana, waalidkii noloshii bay la tiicayaan, bariiskaas un bay usoo buuxiyaan, wadaadka masaajidka joogaa isaguna badanaa arrimaha dhallinyarada kama hadlo, haddii uuba ka hadlana waxaa uu hiifaa surweelka canqowga dhaafsan iyo foodda dheer oo Axmed uu qurux u arko. Magaaladu malaha maktabado buug la akhristo taal, lagumana qabto kulammo lagu dhiso maanka dhallinyarada, dowladduna iska daa in ay wax u qabato eh, wiilka dhallinyarada ah waaba iska dambiile, raaf kasta dhallinyarada un baa la guraa.... Adigu xaalkooda waa sida "Hal laba midigle dheelmiyey, dhanna uma fiyooba".
Intaa markii aan isla fahannay, waxaa laga yaabaa in ay maankaaga kusoo dhacday "Wakhti adag oo xoolo dhaqato la ahaa baa jiray, dadkaan suuraha laga badiyey ee cuno, cab oo wax baro laga la'yahay, ha ii shuushaamin.. Wiil laba iyo toban jira haddii uu lali ahaan waayo, marti leyl-dhexaad timid haddii uu luunka ka rogi waayo, raganimo luddii kuma jirtee, liciye ogaada". Waxaani dad maahee waa khasaaro!. Waa run oo marka miisaanka baadiyaha aad ku cabbirtid qof magaalo ku dhashay, waad ku saxantahay. Balse sidaa maaha xaaji, magaalaa la joogaa, duniduna sidii hore ma aha, caqliyad la socota casriga oo fahan fog u leh qaab fikirka dhallinyarada iyo waxa saameynaya waa in aad la nimaadnaa.
Eeg, sidii hore dunidu uma weyna, waxwalba oo dhacay maantay waxaa kaa xiga un in aad mobile-kaaga khadka internet-ka aad u furtid. Waxaa la marayaa in qofku xitaa uu ganacsi weyn abuuro isaga oo qolkiisa jiifa, in uu caan noqdo isaga oo aanan meelna u dhaqaaqin, waxaaba dhacday in dowlado waaweyn ay af-gembiyaan wiilal de'yar oo khadkaa kujira. Waxa kula weyn ee ah cun, cab wax baro, maantay waxweyn ma ahan, casriga maantay waxaa hoggaamiya technology, celcelis dadka bilaaba hal'abuurka ganacsi ee technologyadda de'doodu waa 42 jir. Nasiib darro, dadka aayaha dalka wax laga weydiiyo, de'daas iyo wax badan ayey ka weynyihiin, waana tan keentay iyadoo +70% Soomaaliya dadkeedu ay dhallinyaro yihiin, misana aysan jirin cid wax iska weydiisa mustaqbalka dhallinyaradeenna. Waxaana ay baylah u noqdeen in laga dhigo awoodda loo adeegsado mashruuc kasta oo dalka ka socda - nooc kasta ha ahaadee -.
Sida xalku yahay maaha in aannu iskasii daawanno baaba'a nagusii socda oo haddii aynaan u dhaqaaqin, jiilkan dayaca ku garaadsaday ay iyaguna halkii kasii wadayaan, maadaama aysan jirin cid u jeexday jaantuus ay ku horumariyaan nafohooda iyo qarankooda. Aqoonyahanka dhallinyarada ah ee dhanna ka fahmaya jiilka soo kacaya, dhanna xambaarsan aqoonta, dhanna keeni kara aragti fog oo aannu ku samatabixinno ummadeenna iyo aayohooda, waxaa waajib ku ah in ay maantay u istaagaan yagleelka aayaha ummadda.
Waxaannu ubaahannahay helidda dowladnimo samaysa aragti weyn oo qaran taas oo hirgelisa nidaam waxbarasho oo leh barbaarin dhallinteenna ku ababisa akhlaaqda suubban, wadaniyadda, aqoon-jacaylka, waxsoosaarka, waxaanna ku gaari karnaa helidda dowladnimo bulshadu ay dooratay. Iyagoo ku dooranaya cidda hoggaaminaysa kartidooda, aqoontooda, sooyaalkooda iyo aragtida ay rabaan in ay ummadda ku hoggaamiyaan.
Waxaan kusoo gunaanadayaa, hab nololeedka aannu la qabsannay ee cidwalba ay rabto in ay hesho nolol qurxoon iyadoo aanan bixin dedaal u qalma, waxaa uu inoosii hoggaaminayaa dhalanteed, in ay wax sii xumaadaan un mooyee, waxba inoo hagaagi mayaan, waxaanna nahay sida qofka balwadda leh ee habeen walba go'aan sada in uu berri joojinayo, balse marka waagu beryo u jarmaadaya halkii uu maalinkaa caqaarta kasoo dhacsan lahaa.
FG. Axmed waa shakhsiyad male-awaal ah.
Faafi
Comments
Post a Comment