Silsiladda Aflaamta Mission Impossible, gaar ahaan labada filin ee u dambeeyey (Rogue, 2015 iyo Fallout, 2018) waxaa uu jilaaga weyn Tom Cruise u bareerayaa samaynta laba muuqaal oo khatar dhab ah geliyey noloshiisa. Filmka Rogue, Tom waxaa uu 8 jeer jembiga qabsaday diyaarad si dhab ah u duulaysa, si loo helo muuqaal sax ah oo la rabay in uu filmka ku jiro (Eeg sawirka 1aad). Filmka Fallout, Tom waxaa si dhab ah uu uga jabay canqowga (odey ka boohista), kaddib markii uu duubayey muuqaal, kaas oo uu laba guri u kala boodayey (Eeg sawirka 2aad).
Tom, marka lagasoo noqdo in isagu uu doorto samaynta qar iska-tuurka aflaamtiisa qurxiya, waxaa ka dambeeya qiimeynta golaha Akademiyadda Hollywood-ka ee bixisa abaal marinta Oskarka. Golahaan oo ka kooban 6,000 oo xubnood ayaa u kala qeynsan 17 laamood, kuwaas oo qiimeynaya ilbiriqsi kasta oo ku saabsan filmkaas dhab u jilitaankiisa, codka tayadiisa, lebiska, goobta, hab duubidda, naqshadaynta, muusigga iyo soosaarista.
Qormadaan oo aan ku durayo dedaal yarida ka muuqata dadka bulshadeenna wax usheega, gaar ahaan wacyigelinta, anigoo tooshka ku ifinaya khudbadaha jimcaha. Shakhsi ahaan, waxyaabihii la yaabka lahaa ee aan usoo joogay waxaa kamid ahaa, maalin in khudbad ahaan naloogu akhriyey buug diini ah hordhiciis. Waxaa kale oo aan u soo joogay shiikh masaajid ka khudbayn jiray oo howli ku timid, kadibna khudbaddii isagoo wadaad kale kala hadlaya teleefoon ku leh "Khudbadihii hore ugusoo celi". Tiro maleh iyada oo dhacdooyin waaweyn ay deegaanka ka dheceen, khudbadaha jimcuhuna maalmahaas looga hadlayey arrimo guud.
Fashilka ka jira hab wacyigelinta bulshada ee ka maran xaqdhowrka garaadka dhegeysteyaasha, waxaa ay keentay in halkii dib la'isugu noqon lahaa, laba yiraahdo "Fasaad baa jira, diinta waalaga hijroonayaa, cilmaani, caqlaani iyo mulxid baa la mooday ilbaxnimo". Gaandi ayaa laga weriyaa in uu ahaa horraantiisii bare, marka arday kamida ardeydiisa uu wax fahami waayo ayuu oran jiray "Waan ku fashilmay in aan ardaygaan wax fahansiiyo".
Nin Maraykan ah oo arkay jimcada iyo sida Muslimiintu salaaddaa ay usoo ajiibayaan, khudbadana aamus iyo nidaam ugu dhageysanayaan, ayuu wuxuu ku yiri nin saaxiibkiis oo Muslim "Fursad dahabi ah baad haysataan, taas oo isbuuc walba aad bulshadiinna wax ugu kordhin kartaan".
Marka ixtiraam loo hayo garaadka dadka, waxaa imaanaysa in dedaalku gaaro naf khatar intaa le'eg la geliyo, waxaana ay muujinaysaa ka dhabaynta tixgelinta dadka ku bixinaya wakhtiga iyo lacagta si ay kuu dhegeystaan.
"Ula dhaqan dadka kugu xidhan in ay yihiin kuwo aad u garaad sarreeyaa, leh caadifad madax bannaan oo fursadna kuu siinaya in ay wax dareemaan". ~Han Zimmer
Suubaneheennu NNKH waxa uu ahaa marka uu dadka la hadlayo mid ay ka muuqato wajigiisii sharafta badnaa dareen, damqasho, dhiirrigelin, waxaana uu tusaale u ahaa waxwalba oo uu sheegayo. Aniga iyo adigaba waa in aan sunnadaas soo nooleyno.
"ILAAHAY waa ku jeclaadaa midkii marka uu howl qabanayo in uu sugo". ~Xadiis
Faafi
Comments
Post a Comment