Waa markii 2aad oo aan maqlo isaga oo heesaya, inkasta oo aan socod dheereeya ku dhaafo, misana ilbiriqsigaa uu codkiisu dhagtayda ku dhacayo waxa iqaadda mawjadda dareenka leh ee heestiisu leedahay. Waxa aan u malaynayaa in uu yahay qof waalan oo daaqadda qolka uu ka xiranyahay ay tahay masraxa uu ku heeso. Waallidiisaa loo qaataa, haddii uu miyir qabi lahaa, codkiisa cuddoon ee quluubta gilgilayana uu ku qaadi lahaa heesaha ilmada shuba, nolosha midabbeeya, dadka isjecelna ay isu qaadaan, faquuq uusan hadda qabin ayuu la waalan lahaa. "Faasiq, junuudd-ibliis, ehlu-naar, iyo wax ka daran" ayaa loogu yeeri lahaa. Balse hadda waallidaa uu qabo baa looga xishoodaa, waxkasta oo uu qaado, si kasta oo ay u dareen badanyihiin, waxaa la leeyahay "War naga daaya qofka waalan warkiisa". Halkaa waxaa ku dilan codka qofkasta oo ku hadla fikir dareen iyo damqasho leh, xirfadleyda hal'abuurka iyo fanka, abwaannada iyo cidkasta oo si qurxoon wax u hoga tusaaleysa. Markaa, bulshadu waxa ay weyday mid kamida 2da cunsur ee ugu waaweyn kuwaa oo ummadaha haga oo kala ah Hoggaamiyeyaalka iyo Hal'abuurayaasha. Eegooy, waxa ay dhahaan waallida iyo hal'abuurka waxa u dhexeeya wax yar oo xabbad tin ah le'eg. Tusaale, qofkii joogay 100 sano kahor haddii loo sheego in "Video Call" wax la dhoho laba qof oo daafaha dunida kala jooga baa is arkaya oo is maqlaya baa la gaari doonaa, wuxuu aaminayaa in wax waalli lagala hadlayo. Waaqica aannu imika joogno luqadda dadku fahmaan, tixgelintana u hayaan waa xoogga, boobka, cabsi gelinta, jajuubka iyo isla weynida. Si aad u ilaashatid naftaada, hantidaada iyo sharaftaada, waad ku khasbantahay in aad ugu yaraan gafuurka taagtid si aanan laguugu soo xadgudbin.
Comments
Post a Comment