Gabdhihii Reer Mudugga ahaa ee xabadka garaaci jiray ma arki waayeen?"

"Adeeroow, nimanka intaa laale'eg gabdhihii Reer Mudugga ahaa ee xabadka garaaci jiray ma arki waayeen?" (Oday SSDF kamid ahaa baa iweydiiyey)

Safarkii aan saakay kagasoo baxay Qardho baan meel dhexe oo aan ka quraacannay waxaan isku aragnay nin oday ah oo ka mid ahaa jabhaddii SSDF. Bariido, salaan iyo is haybsi kadib, waxaannu ka sheekeysannay arrimo ay kamid ahaayeen Jubbaland, Dowladda Federal-ka, odayaal qaraabadayda ah oo jabhadda ay ka wada tirsanaayeen. Sheekadii baa waxay nalasoo gashay Puntland, waxa uu iwaydiiyey kiiskii Caasho Ilyaas ALLAHA unaxariistee iyo halkii uu ku dambeeyey. Waxaa yaab leh, inta aannan odaygaa is arag baa mar waxaa maskaxdayda kusoo dhacay isla qadiyadda marxuumadda. Waxa aan uga xog warramay halka ay howshu marayso iyo in mujrimiintii la xukumay, balse aanan wali lagu fulin dilkii. Waxa uu i yiri "Adeeroow, nimanka intaa laale'eg gabdhihii Reer Mudugga ahaa ee xabadka garaaci jiray - Tilmaan qeexeysa qab, dadnimo iyo gobanimo, ma arki waayeen? Gabar yar oo abti loo yahay in sidaa loo galo waa nagu GUNNIMO, nimankaasuna haddii aanan lagu fulin xukunka, waa dullinimo iyo damiir xumo inteeda le'eg oo aanan na qaban".

Odaygu waxa uu ka haray rag dullimada nacayb ay u qabaan ula diriray dowlad dhan oo dalka oo dhan haysatay, damiirkiisa iyo dadnimadiisa ayaana qaadan weyday in wali nimankaasu nasii dhex joogaan. "Adeer, waxaa kasii liita niman dhaqan iyo odayaal sheeganaya oo leh nimankaas yaanan gabar loo toogan. Nolol jacaylka qaar waxa uu na baday in aan dullinimo kasta u hoganno" baan ku iri.

Qadiyadda marxuumad Caasho Ilyaas waa mid dareenkayaga ku weyn, mana aha mid aan illaawayno, ka harayno, kana aamusayno. Dowladda Puntland waxa aannu faraynaa in ay dareenkayaga iyo dadnimadayada ka tarjunto, dullinimada heeryadeedana ay naga rogto. Caasho Ilyaas in ay cadaalad hesho aayaha Puntland baa ku xiran, ama cadaalad bay heli ama innagaa gunnimo la hoyanayna.

#Justice4Aisha
#Puntland
#Somalia