Oraahda aan ciwaanka uga dhigay qormadan ayaa ah mid carruurnimadii aad loo adeegsan jiray. Micneheeda ama ujeedkeedu waxa uu ahaa in ilmuhu uu turriin iyo isku hallaynta uu qofka weyn ka filayo awgeed uu isku taago, halka asaaggii uu ka baqo, maadaama uusan u turayn oo uu tuu ku dhufto mid le'eg ama ka badan kala kulmayo.
Habeen hore ayaa waxaa isoo gaaray war sheegaya in dhallinyaro isugu jira wiilal iyo gabdho ay duleedka magaalada Qardho u aadeen caways, waxaana halkii ay tageen uga daba tagay ciidan. Muuqaal la sheegay in baraha bulshada uu si xooggan u qabsaday ayaa muujinaya in ciidanku ay dhallinyaradaa oo marka muuqaalka laga duubayo aanan wax anshax xumo ah ka muuqan ay cay, jir-dil iyo hanjabaad isugu dareen.
Waxa aan isweydiiyey, maxay dhallinyaradaasu ku mutaysatay ihaanada intaa le'eg? Maadaama dadka Reer Puntland ay yihiin bulsho muxaafid (Dhaqanka ku adag), saameyn intee le'eg ayey dhallinyaradaa sharafkooda iyo sumcaddooda u geysan kartaa? Waalidiinta Soomaalida oo qaarkood xag jir ah, dhibaato intee le'eg ayey u geysan karaan ubadkooda sida khaldan sawirka looga bixiyey? Dhallinyarada laftigooda oo aynu wada ognahay caqabadaha haysta ee isugu jira kuwo dhaqaale, dhiirrigelin la'aan, tixgelin yar iyo kuwo kale oo badan, maxay kaga ficil qaadan doonaan arrintaas?
Su'aalahaa iyaga ah iyo kuwo kale oo badan, waxa ay mudanyihiin in si dhab ah la'isu dul taago, bulshaduna in aysan fududaysan cawaaqibta ka dhalan karta. Haddii aanan tillaabadaas la qaadinna ay dhici karto in dhallinyaradaas in ay sii fogaadaan, khataro waaweynna u ban baxaan, kuwaas oo qaarkood aanan la mahdin doonin.
Haddii aynu usoo noqonno qaabka ciidanku arrintaa u waajeheen, waxaa muuqata in ay tahay mid ka arradan damqasho iyo naxariis, waxaana dhallinyaradaas ay ula dhaqmeen sida cadowgii oo kale. Puntland waxaa ka jira dhibaatooyin ka waaweyn oo ciidanku ay ahayd in ay wax ka qabtaan kuwaas oo aynu wada ognahay in aanan tillaabooyinkii ku habboonaa laga qaadin, lana dhihi karo ciidanku howlihii ka cuslaa ee ka mudnaa ma aysan u qumine, maxaa ka hor istaagay?
Waxa aan kusoo gunaanadayaa xadiiskii Nebigeenna NNKH ee micnihiisu ahaa "Dadkii idin ka horreeyey waxaa loo rogay marka kan xoogga leh uu wax xado way iska deyn jireen, kan tabarta yarn marka uu wax xado, way ciqaabi jireen".
La wadaag asxaabtaada.
Comments
Post a Comment