Waxa aan isku dayayaa in aan su'aashaa uga jawaabo si yara gude-ballaaran. Burburkii dowladnimo ee nagu habsaday 30-kii sano ee u dambeeyey, waxa aan ka dhaxalnay burbur ballaaran oo dumiyey kaabeyaashii bulsho ee xayn-daabka u ahaa ilaalinta hantida qaran ee lahayd mid la taaban karo iyo mid la dareemi karo. Taasu waxa ay keentay in ay furmaan albaabo waaweyn oo bulshadayada laga soo galo, kuwaas oo dhallan rogay dhaqankii qofka Soomaaliga ahaa ee ku salaysnaa gobanimada, geesinimada, dhowrsoonaanta. Meelaha ugu daran ee bulshooyinka laga soo galo waxaa ugu waaweyn haldoorkeeda. Soomaalida waxaa hoggaamiya dhaqanka beelaha, culimada diinta iyo siyaasiyiinta, intaba maantay waxa ay ku suntanyihiin xagal-daacin ay saldhig u tahay masuuliyad darro. Maantay la yaab maleh in aynu aragno oday dhaqameed laaluush ku iibsanaya ammaanadii uu beesha u qaaday, caadi ayey noqotay in wadaadku kooxdiisa uu gar iyo gardarraba ku taageero, siyaasiguna kamaba xishoodo in uu xatooyada hantida qaranka uu xalaaleysto, waana sababta aynu kaalinta 1aad uga jirno dalalka musuqu halakeeyey.
Haddii aan usoo laabto su'aalihii hore ee ku aaddanaa darawalkii gaariga ku dilay hooyada xaamilada ahayd, waxaa aan u sababeynayaa in ay ku kalliftay arrintaa masuuliyad in aanu markii horena gaariga wadidiisa iska saarin, markii dambe ee uu shilka geystayna aanu masuuliyaddii dhibaatada uusan qaadan. Dhanka kale waxa aanan jirin la xisaabtan dhab ah oo uu ka baqayo, kaas oo ku kallifaya wax un baqdin ah ama is dhowrid ah oo uu kala kulmayo dowladda, maadaama haddii dhib ay timaaddo, dowladdu keliya ay leedahay inta hore in ay soo xirto, balse aanu jirin ciqaab uu mutaysanayo qofka gaariga si taxadar li'i ah ugu wada magaalada dhexdeeda ama bannaankeeda, taas bedelkeeda waxa uu geysto ay jirto beel weyn oo uu ka dhashay, taas oo magta ka bixinaysa iyo beesha dhibbanaha oo magta qaadanaysa, aayarna howshaa lagu sunti doono in ay tahay wax ku dhacay KAMA'.
Darawalka keligii ma aha ninka khalad kasta oo uu galo ku badbaadaya, balse sidaa oo kale ayuu siyaasigu jid ugu helayaa khaladkiisa, haddii aad isku daydo in aad dhalliisho, iska daa in wax loo qabsado eh, waxa aad arkeysaa mid sidaada oo kale dhibbane u noqday masuuliyad darrada uu siyaasigu sababteeda lahaa oo ku leh "Adeeroow, maxaad hebel ka rabtaa? Ma kaligiisaa wax booba! Waddanka oo dhan baa la boobaa", ama haddii ay isku hayb yihiin "Adeeroow, annaguba siyaasi hebel oo aad isku beel tihiin waxba kama sheegi jirine, maxaa kaayaga ku tusay".
Isaga oo tusaale ka bixinaya dadka soohdimaha ILAAHAY ku taagan iyo kuwa ku xad-gudba, ayuu Suubbaneheennu NNKH tusaale usoo qaatay qolyo doon isla raacay, doontaas oo ahayd mid laba dabaq ah, waxaa qolada hoose is tiri "Wari qolyaha kore socod baannu ku wareerinnay eh, haddii aynu aayar doonnida inta hoose meel ka duleeshanno, aayarna biyaha halkaa aynu ka dhurano, soo arrin ma aha! Haddii ay qolyaha sare faraha ka qaadan waa isla rogmayaaniin, haddii ay gacmaha qabtaanna waa ay wada badbaadayaan.
Bulshadayadu maantay waxa ay la balan-balaysaa waa caayibnimada la caadeystay. Heer waxa aynu joognaa qofka xumaha ku hadaaqaya uu dhiirranyahay, halka kii samaha sheegi lahaa oo sarbeeb iyo hadal saran wax ku cabbirayo.
Xalku waxa uu ku jiraa in caayibnimada la'iska rogo, qofwalba oo inaka mid ahna uu marka 1aad tiisa soxo, marka xigtana inta hoos timaadda uu tusaale ugu noqdo toosnaanta, marka wixii ka dambeeya waxa inoosoo harayba waa in aynaan garab istaagin wixii xumaan wada xitaa haddii uu dadka noogu sokeeyo, waayo balaayadu cirka inoogama iman, waa isla innagii oo qaarkeen balada garab iyo gaashaan u ah.
Mahadanid wll
ReplyDelete