Hoo, waad keeniye!

                                  

Sawirkan Google ayaan kasoo xigtay

Cilmi baaris la sameeyey ayaa waxa ay ku dhisnayd weydiin oranaysa "Dadku yey wax siiyaan?". Ma qofka baahan bay wax siiyaan? Ma kan tabarta yar bay wax siiyaan? Ma kay danta ka leeyihiin bay wax siiyaan? Ma kan xiga ee sokeeyaha ah bay wax siiyaan? .... 

Baaritaan dheer kadib waxaa soo baxday in dadku ay wax siiyaan cidda iyaga wax siisa. Sidaa awgeed ayaa imika ganacsiyada horumaray ay u fahmeen falsafaddaas, waxaana ay kamid tahay qaababka ay macaamiisha ku kasbadaan. Shirkadaha qaar ayaa kusiinaya hadiyado yar-yar oo aanan qiime badan ku fadhin, si berri ka maalin marka aad suuqa timaaddo aad u xusuusnaatid hadyadoodii yarayd, ayna kugu dhaliso in aadan lacagta la dhaafin oo xaalkaagu noqdo "Af wax cunay xishoo". Adiga oo gobanimadaada ilaashanayana waxa aad kaga falcelinaysaa hadyaddii lagu siiyey in aad wax ka iibsatid shirkaddaa. Markaa waxa meesha ka dhacaysa"Gacma is dhaafay baa galladi ka dhalataa".

Aadanuhu waa baahane aanan dhergin, balse dad yar oo fahmay falsafadda aan u bixiyey "Hoo, Waad keeniye", waxa ay si xarfad leh ugu guuleysteen in ay shabaqa ku ritaan fursad walba oo ay ku helaan cidda markaa ay dan ka gasho.

Haddaba sidee baannu "Hoo, Waad keeniye" ugu bedelnaa tab aan noloshayada ku horumarin karno. Tusaale, haddii aad dooneysid in qolo aad dan kaa gashay ka dhamaysatid, waxaa lagaaga baahanyahay in aad baaritaan ku samaysid halka ay qoladaasi ka jilicsantahay oo noqon karta wax ay jecelyihiin sida shakhsi, shay, amaan, iwm oo haddiiba halkaa lagasoo galo ay khasnadaha furayaan. Waxaa xiga in aad marka 1aad cidda isku deydid in aad lasoo jaanqaaddid si aysan kaaga didin oo isbarasho iyo is fahan macquul ah uu idin dhexmaro. Ugu dambeynna waxa aad si lama filaan ah uga abbaareysaa halkii ay ka debecsanaayeen. Markaa qofkaasu waxa uu kuu noqonayaa mid kaynaanka aad u heysid, fursadda in aad ka heshid wixii aad ka rabtayna aad bay u sarreynaysaa. Intaa kadib marka aad usoo bandhigaysid dantaada, waxa aad si weyn isaga ilaalisaa in aad wax u tustid in aad adigu baahantahay, waxa aadna ku dadaalaysaa in aad ka dhextustid fursad dahabi ah oo uu ka dheefayo.

Dhanka kale, waxaa jira in dad badan oo adiga dan kaasoo geleyso, ayna tahay in aad u fududeysid danahooda, markaa waxa aad u baahantahay in maskaxdaadu aanay u shaqayn sida marka aad taada u howlgalayso, balse aad is xusuusidid in dadku aanay sidaada oo kale ku hubaysnayn xirfaddan dahabiga ah. Waxa aadna naftaada ku qancinaysaa in aad iskasoo qaaddid qofka adiga kuu dan sheeganaya, sida aad jeclaanlahaydna in aad ugu hagar baxdid, is maqashii oraahda Qur'aanka ah ee micneheedu ahaa "U samafal, sida ILAAHAY adiga kuugu samafalay" — maba keeni karno in aannu sida ILAAHAY inoogu samafalo aan u samafalno eh, ~ Qasas, 77. 

Ogowna "Bartii yaqaan, bari uma kororto".

War ma gartay?