Lama filaan!

Askarigan ma aha kan qisada ku jira

Waa markale iyo sheekooyinkii gaadiidka dadweynaha dushiisa eh, waxaa duhurradii maantay gaari wada raacnay muwaadin Yemeni ah oo ka ganacsada Boosaaso, kaas oo wareejiya cadarrada. Saakay sheeko saas ah nama dhex marin, balse galabtay ayuu markale Yemenigii gaariga nala soo fuulay. Markii uu soo fariistay baan iri “صدفة” lama filaan ayeynu galabtayna ku kulannay. “Haa waa innagii saakay isku gaariga saarnayn” ayuu Af-Carabi igu yiri. Rakaabka galabtay waxaa kamid ahaa askari qori AK47 ah wata, ammaankuna u furanyahay. Yemenigu markaa galabtii shaqo umasoo bixin ee inta labiskii ay dhaqanka u lahaayeen – macawistii go’a ahayd iyo shaar buu iskusoo taagay. Askarigii baa hadalkii nala qeybsaday, Yemenigii ayuu ku yiri isaga oo Af-Soomaali ku hadlaya “Macawistayada oo kale ma gashataan miyaa? Waxaan maxay ahayd?” Markaa askarigu waxa uu ku lebbisanyahay macawis. Maadaama uusan Yemenigu Af-Soomaaliga fahmayn ayaan u tarjumay. Yemenigii ayaa yiri innagu dhaqan ayey noo tahay macawistaan, dalab ayeyna Yemen nooga timaadda, marka isku nooc ma xiranno. Askarigii ayaa garowsaday in ay dhici karto in ninkaan Yemeniga ahi uu u fasirto hadalkiisa in uu handadaad iyo hanjabaad u arko, waxa uuna ii sheegay in uusan waxba baqin ee uu ujeedku ahaa in uu wax ka ogaado lebiskiisa, sidoo kale qoriga aan wato yuunan ka baqin ayuu yiri. Sidii ayaana mar kale ugu tarjumay. Yemenigii ayaa dhoolla cadeeyey, waxa uuna yiri waxa aad u sheegtaa innagu hubka waan naqaan.

Waxaa laga yaabaa in askarigaa haddii uu wadada kaaga soo horboxo uuna waxba qiime badan kula yeelan, balse waxa uu ahaa halyeey ku hubaysan gobanimo xeeldheer, taas oo dhadhansan karta qofka kale dareenkiisa iyo shucuurtiisa. Walaaleheen Yementu waxa aynu burburkii qarankayaga ku dhacay dalkooda nooga dhigeen meel aan ubaxsanno, markii ay iyaguna cadowgu helooday oo ay noosoo qexeen waxaa jiray gurmad iyo gobanimo mug leh oo aan kala hortagnay, dhanka kale waxaa jiray qaarkeen u hunguriyooday inamohooda baahidu bakhtiga u xalaaleysay oo u hawooday in ay dumarkaa cidlo ka helaan. Qofkasta oo damaciisu ka xoog bato dadnimadiisa waxa uu noqda bahal leh muuqaal dad. Sida askarigii galabtay waa in aynu ku hubaysnaannaa gobanimo gowsaha joogta.

Galab wanaagsan