Ma is taqaan!

Halku dhigga falsafiga ah ee Giriiggu ku caan bexeen ee ku xardhan Macbadka Apollo, Delphi

Inkastoo qormadani aysan ka jawaabi karin mugga naftayadu ay leedahay, misana qofku in uu naftiisa bartaa ma aha wax aynu Soomaali ahaan aqoon u leennahay. Waxaa laga yaabaa haddii midkeen la weydiiyo "Yaad tahay?", in uu isku sifeeyo muuqaalkiisa, qabiilkiisa, diintiisa, aqoontiisa, midabkiisa, jinsiyaddiisa, hantidiisa, de'diisa iwm.

Waxyaabaha aan soo sheegnay ee aannu isu qabno in ay na qeexi karaan, mawada aha waxa aannu ka koobannahay. Si aan usii fahanno waxa aannu nahay in aysan ahayn waxyaabaha aynu kasbannay marxaladihii kala duwanaa ee aannu soo marnay, haddii nala weydiin lahaa 10 sano ka hor "Yaad tahay?", waxyaabo aan imika sheeganayno, mug uma aanan lahaanneen in aan qaarkeed iska daa in aannu sheeganno eh, aan fahamno waxa ay tahay.

Sidaa awgeed, innagu markasta oo aan joogno, waxa aan kororsanaynaa mug hor leh oo ku xiran hadba inta waayo aragnimo ee aan kororsanno.

Dhanka kale, waxaa laga yaabaa in aynaanba aqoonin awoodahayaga, shakhsiyadeenna, meelaha aannu ku xooggannahay iyo meelaha kale ee aan ka tabar darannahay, waxaana ku ogaan karnaa in aan u fiirsanno falcelinteenna ku aaddan duruufaha kala duwan ee nasoo wajaha, sidoo kale in aan dhuuxno waxyaabaha ka guuxaya maskaxdayada oo ah gundhigga hab nololeedkeenna.

Waxa aan rumaysanahay in aanu qofna ka salgaari karin xaqiiqada uu isagu yahay, misana hadba inta aannu waayo aragnimo kala duwan ee aan helno, ayaa furaya mug hor leh oo aanan horey u fileyn in aan gaari karnay. 

Si aannu u gaarno heerarkaa dahsoon, waa in aannu naftayada ku tuurnaa waayo aragnimooyin kala duwan, sida in aannu safarro kala duwan galno, bulshooyin hor leh baranno, buugaag kala duwan akhrinno, waa in aanu la sheekeysanno dadyow kala geddisan, kuwaas oo noloshu kala heerka gelisay, kadibna qofwalbana waayo aragnimadiisa aan ka dab qaadanno, intaa kadibna aan khibradahaa kala duwan sida muraayaddii aan naftayada ku eegno, kadibna is weydiinno sidee bay naftayadu ahaan lahayd haddii aannu duruufaha dadyowgaa kale ku suganyihiin aan ku sugnaan lahayn, sidee baannu uga falcelin lahayn haddii xilliyada aannu taariikhdooda akhrinayno noolaan lahayn, heerkee bay garashadaydu gaarsiisnaan lahayd haddii aan umadaha kala duwan mid un ka dhalan lahayn...

Ugu dambeyn, markasta oo aan wax un ka fahanno inta aannu naftayada ka naqaan - iyada oo aanan ka badbadinayn, ama hoos isu dhigeyn, waxa aan awood u yeelanaynaa in aan nolosha ku jibaaxno awoodahayaga garasho ee aannu kasbannay, si ay noogu hagaan in aan kaga falcelinno arrimaha nasoo waajahaya innaga oo ku hubeysan xigmad.