Codka kuu baxaya!

"Iska eeg ereyada aad adeegsanaysid. Ha moodin in aad adeegsanaysid, iyagaa ku adeegsanaya". ~ Dr. Cadnaan Ibraahiim

Dadka qaar marka ay isla hadlayaan kor bay isula hadlaan, waxaana dhici karta in dadku maqlaan ama arkaan qofkii oo faraha taag-taagaya. Balse badankeen si hoose baannu isula hadalnaa. Hadba arrimaha noloshayada khuseeya ama duruufaha nagu xeeran baana ah halka aynu hadalkaa naga dhex guuxaya ku faanqeyno. Barta Facebook ee wax lagu qoro, waxaa si har ah ugu qoran "What's on your mind?". Waxaana ka dhashay in dad badan halkaa ay ku burqadeen, calooshoodana ay fureen. Ujeedkaygu waxa weeye in aannu marka 1aadba ogaanno — waliba si foojignaan leh, hadallada naga dhex guuxaya halka ay noo wadaan. Haddii ay baqdin, filasho xumo, baaseysi iyo natiijo xun ay marwalba kuu muuqato, waxa aad u baahantahay in si deg-deg ah aad isaga gaarto, adiga oo ka billaabaya in aad joojisid hab fikirka noocaa ah. Maadaama aynu nahay dad Muslim ah, waxaa diinteenna macaan ina fareysaa in aynu samaha filanno "Fisha samaha, waad heleysaan eh" Suubbaneheenna Sharfanaa nabad iyo naxariistii ALLE ha kor yeelee baa yiri. Filashada xuni waxa ay naga curyaamisaa wax isku dayga, waxaana durba kuu muuqanaya jab iyo naasa beel. Adiga oo aanan isku wareerin waxa kuusoo baxaya "Tillaabo qaad" maskaxda ku qafil oo keli ah, codka kuu baxaya ee leh "War waxba heli maysid, cidna kuma rabto, waxba kaama horreeyaan, iska daa" ku dheh "War bal horta aannu tillaabo qaadno, wax in la waayo waxaa lagu beenin karaa in wax la raadiyo eh".  وَهُزِّىٓ إِلَيْكِ بِجِذْعِ ٱلنَّخْلَةِ تُسَٰقِطْ عَلَيْكِ رُطَبًا جَنِيًّا صدق الله العظيم