Wax dhaqaaji!

"Maandhoow in wax la billaabaa door roon" ~ Awoowe Xaaji Dayib

Todobaatan jir dhaqan u leh in aysan salaaddu shanta masaajidka ku seegin marka aad weydiiso "Xigmad aan kaa gunto ii sheeg awoowe?", waxa uu kuu sheego iyo ficilkiisa marka aad u fiirsatid, waxa aad baranaysaa darsi nololeed tobanaan sano ku yimid howl maalinkii shan jeer lagu guuleysto. Awoowgay Xaaji Dayib marka aan nidaamkiisa nololeed, gaar ahaan salaadda u dib u milicsado, waxa uu isoo xusuusiyaa xadiiskii Nebigeenna Muxammed Nabadgeliyo iyo naxariis korkiisa ha ahaatee micnihiisu ahaa in uu Nebigu gurigiisa marka uu joogo howlaha guriga ka qeyb qaadan jiray, balse marka salaadda la gaaro uu hal mar dhaqaaqi jiray sida in uusan isagu na aqoon, innaguna aan isaga aqoon. Awoowe uma aabbo yeeli jirin daal, xanuun, kulayl, tabar darro, tuugo in ay hesho, salaaddana waxa ay u ahayd tiir-dhexaadka noloshiisa.

Haddii aan usoo laabto ujeedka qormadaydan, waxa aan isweydiiyey "Markii aynu carruurta ahayn, habeenka ka horreeya maalinka cidda ayaa ugu dheeraa, waayo subax farxadeed ayuu naga fogeyn jiray. Dhadhanka xiisaha leh waxaa gundhig u ahaa in berri tahay maalin howlo badan oo aannu u madax bannaanahay aan qabsan jirnay. Imika waxa noloshayada xiisaha ka qaaday mala dhihi karaa waa in aysan jirin howlo aannu u madax bannaanahay oo qabashadeedu xiise inaku hayso?"

Si aynu bal wax un u bedelno, aynu isku xukunno in aan howlo badan dhaqaajinno. Salaadaha aynu aqinka tijaabinno in aan masaajidka haleelno, amaba meesha aan joogno ku xiranno. Ha jiro Buug aan billowno kol aan maalinkiiba hal bog aan ka akhrinno, cashar maaddo aynu xiiseyno YouTube ama meel kale aannu ka billowno, ganacsi yar oo hal shey aan iibinno Online (Facebook, Twitter, Instsagram, Whatsapp) aan ku iibinno, Push-up maalinkii 3 xabbo aan samayno, waalidka iyo qaraabada isbuucii (jimcada) ugu yaraan aan wacno. Arrimahaa aan dhaqaajinnayna ha jiraan wax aan kusoo xusuusanno, sida awoowe uu aadaanka salaadda u xusuusin jirnay. Ha jirto wakhti aan howlahaa qabsanno, haddii illowshiiyuhu inagu badanyahay, aynu Alarm-ka telefoonka ku xirno xusuusiye inaku baraarujiya howlihii aynu dhaqaajinnay.

وقل إعملوا فسير الله عملكم ورسوله والمؤمنون.