Ku adkee!

"Ilbaxnimadu waxa ay ka dhalataa firaaqo" ~ Minguurin Sideedaba nafta waxaa u fudud in ay wax xumayso. Aad iyo aad bay u adagtahay in aad wanaagsanaatid. Waayo wanaaggu ma aha wax qofku isaga dhasho, balse waxa ay ka timaaddaa qof fahan xeel dheer u leh falcelinta ka dhalanaysa waxa uu ku koco, taasina waxa ay u baahantahay aqoon, garasho iyo dadnimo. Innaga oo awalba iska ahayn bulsho reer Guuraa ah, waxaa noo raacay jaahwareer ka dhashay miyigii oo aan kasoo tagnay, magaaladiina aynu afgambi ku qabsannay. Waa halkeennii eh "Wiil tuulo ku dhashay magaalaa gaari ku jiiraa." Noloshu aad bay u adagtahay. Ninka dukaanka leh macaamiishiisa masoo dhaweeyo, marka uu wax ka gadanayana cagajiid, waji kuduud iyo canaan buu isugu daraa, maba yaqaan wax la yiraahdo "Customer Care", dadkuna waa noociisa, sidaasay ku wataan, dhibna uma arkaan dhaqan adeygiisa iyo macaamil xumadiisa. Macallinka dugsiga ee aanan ardeyda si arxan darro ah u uleyn, ciyaalkuna aysan ka kaadshin, macallinba looma yaqaan, mana aysan gaarin risaaladii Nebiga Nabadgeliyo iyo Naxariis korkiisa ha ahaatee ee oranaysay "Nagama mid ah keenna aanan u turin ubadkeenna, waayeelkeennana aanan maamuusin". Si kale waxba uma fahmi kartid eh, waxa falsafaddiisu ay ka duulaysaa maahmaahdii Carbeed ee oranaysay "Dameerku, wax aanan ul ahayn kuma socdo", ardeydu waa kadin dameero ah oo xero ugu dayran, kadabkooduu jaraa, waalidkuna waxa ay siiyeen afiso "Macallin, dubka adaa leh, anna lafahaan leeyahay." Bal suureyso ilmaha waxaa lagu anqarinayo xaggee buu u ciirsanayaa? Cilmiga lagu qulaaminayo se, jacayl iyo xiise ma u baranayaa? Siyaasigu, kaasaa ugu daran eh, miyigii waxaa siyaasad noogu horreysay - Ciddii soo gaartay, kacaankii. Wallaahay haddii aadan guulwade ahayn, kacaan diid baad tahay, liin baadna ugu dambeyn xabsiga ku cabbi. Madaxda aanan shacabka cabburin waa niman aad u jilicsan, dadnimana looma hayo. Adiga caadiga ah ee akhrinaya ayaaba si fog ay maankaaga uga daadagsantahay, mana taqaannid quraafaadkaa meesha aad kala timid, waxaana dhacda in aad ku maahmaahdid "Soomaalidu ma xishootee way baqdaa." Waa ummad dhimrintu ay aad uga liidato, ninka marwadiisa shuushaamiya, waxay dhahaan "Ar waa sixratay, geed buu ugu xiranahay." Marka la rabo in dumarka la bajaqiyo loo meel daydo waxaa lagu maahmaahaa "Ninkii xanan u dhiga, xariir bay u dhigaan, ninkii xariir u dhigana xanan bay u dhigaan." Intaas aan uga haro, wixii kale adigu meesha bannaan ku buuxso, waxaanse kuusii qaddimi natiijada kuusoo bixi doonta oo ah "Ku adkee" Haddaba dadka noocaa ahi goorma ayey gaari doonaan marxalad noloshu macaantahay, dadkuna aanay isku adkeynayn. Qofka dedaalana loo sacbinayo, billad la siinayo, taallo loo qorayo, buug laga allifayo? Waa bulsho si xeel dheer u burburtay, daallan, xaalkooduna waa "Nothing to lose" Waxaana ay ku cayntaan diinta Islamka ah oo xoogaa nuxur yar oo ay kusii luudaan siisay, ma ahee waa hore bay sidii cawaantii is diiran lahaayeen.