Silsiladdii Daaca-Qurun - Qeybtii 1aad

"Dadka qaar marka ay noloshu u fududaato ayey dadka kale ku adkeeyaan, halka qaarka kale iyada oo ay ku adagtahay misana ku dedaala in ay dadka kale nolosha u fududeeyaan." Soomaalidu waxa ay soo martay marxalad adag oo soddon jirsatay. Dadkii joogay qaarna waxa ay ka shaqeynayeen in xaalku sii adkaado, halka qaarka kale ay u weelqaadayeen bal wax un in la amaamudo. Xilli waxaa jiray dadku sinnaayeen, gaajo iyo oon loo le'anayey, rasaas iyo colaad aanan waxweyn ku fadhin huf la'isaga dhigay, firxadkii ka dhacayna uu afarta gees ee dunida tagay. Carab iyo Cajam midkoodna nooma gurman, qarankayagii dumayna - Suu rabo ha ahaadee, si xarrago leh bay dunidu u daawatay dumitaankiisa. Waxay isdaba socotaba nin iyo dadnimadii waxbaa meelwalba laga dhaqaajiyey. Dowladnimada rag baa u qalab qaatay, aqoonta kuwaa jeeso u xantoobsaday, ganacsiga qaar kalaa dabakaayooyin u furtay, caafimaadka wixii wax yiqiin baa silinge u cabbeystay, waxaas la wad-wadayna ninba dadnimadii, aragtidii, garaadkii buu meel wax soo gaarsiiyey. Maantay ma jirto maalin aan ka tabar iyo taag roonnahay, misana talo iyo garaad maantaan ugu liidannaa. "Ilbaxnimada waxaa sameeya geesiyaal, waxaana dumiya doqommo ay dhaleen." ayaa nalagu sifeyn karaa. Dhagweyn baan nahay, mana kala ogin cadow iyo saaxiib, sokeeye iyo shisheeye, bahaahin iyo cayayaan layr loo shiday baan noqonnay. Runtu waxa ay tahay cid wax inoo ogol ma jirto, haddii la heli karo - in ay imanaysana macquule, jaantaa ILAAHAY na dhigay baa la'ina ka suulin lahaa. Waxaa yaab leh sida aan u hadleyno, waxaad mooddaa dad wax u kala haraan, maba ogin in haka dhabqanto meel walba la'inaka soo leeyahay. Waxaana noogu af dheer keennii ugu liitay, waliba isma weydiinno eh, mid ug-xantiisii dibedda taal oo haddii la rabo dibedda jooga ayaa inoo meerinaya kheyrka iyo sharka. Tan ugu daran baa ah nin walba waxa uu rabaa in uu tiisa aayad kaaga dhigo, tan kay is hayaanna kuugu tafsiiro in ay tahay laqwi iyo been abuur. Waxa aan qormadaan taxanaha ah ku beegsanayaa waaqica Soomaalida (Soomaaliya), waxa aanna ku faaqidi doonaa xaalka guud ee ummadayada haysta fursadaha, caqabadaha, awoodaha iyo khataraha. Cid gaar ah toosh ku ifin maayo - Saa warba kama hayee, balse waxa aan xoogga saari waxa Soomaalidu maantay awooddo, misana ay gabi ahaanba baal marsanyihiin.