"Xoog waxaa ugu liita, midka xargaha kaa gooya". ~ Maahmaah
Walaalleyaal nabadgelyo korkiinna ha ahaato, waana is xusuusinaynaa eh, 10kii dambe ee Ramadaan baa lagu jiraa, waliba caaway waa 23 oo Leylatul-Qadriga ILAAHAY ha inoogu aaddiyo. Walaalleyaaloow, labo nin oo Reer Mudug ah oo cod karnimo iyo aftahannimo isku darsaday baad tihiin, majlis walbana warkiinnaa lagu hayaa, balse aan mid idin xusuusiyo. Soomaaliya gobollada maantay ugu horumarka liita Mudug baa kow ka ah, dadkii u dhashayna Dibedda ayuu kii ugu shisheeyey jiraa, dalkana Xamar iyo Boosaaso ayey naftoodii ku aamineen, labadiinnaana tusaale ugu filan Mudug xaalkeeda oo wa idinkaa Yurub u qaxay. Sababta aad halkaa u tagteenna waa colaad ma dhalays ah oo milil iyo malax quluubta degtay gaartay oo dad wada dega oo aanan dabka kala qaadan idinka dhigtay, haddii aad loo sii daba galana wax weyn oo cadaawad heerkaa le'eg ah idinma dhextaal oo waligeed buu Aadane is laynayey, waadna ogtihiin Afrika kuwo malaayiin iska laayey baa nabad qaatay oo heshiiyey, kartiduna waa qofkii awooddiisa u kaashada in uu naftiisa xadgudubka uga xakameeyo, waana fasirkii Xadiiskii Nabigeenna (Nabadgelyo iyo naxariis korkiisa ha ahaatee).
Ilma adeerrayaaloow, hadal ku kala adkaan maysaan ee waxa aan idin kula talinayaa in aad marka 1aad halkaa ku joojisaan colaadda aad hurinaysaan oo aad ILAAHAY ka yaabtaan, aakhirana xusuusataan, qof Muslim ah waa kii marka ILAAHAY la xusuusiyo isgaran jiray eh. Marka 2aad boqollaalka kun ee baraha bulshada idinkala socda uga faa'iideeya in ay dalkooda jeclaadaan oo walaaloobaan, cadow badan baa dalkeennu leeyahaye aanu naga faa'iideysan, haddii ay macquul tahayna aad dhaqaale ururin u samaysaan Ciidsiinta Agoonta, Dhismaha Isbitaallada, Dayactirka Jidadka, si ay idin ku noqoto sadaqo iilka idinkugu soo dhacda oo aanan dhammaan. Marka 3aad casriga aan joogno dunidu Tiknolojiyad bay ku tartamaysaa ee in aad taariikhda Soomaaliya miisaan ku yeelataan idinka oo de'yarta idinku xiran aad uga sheekeysaan sirta Reer Yurub ay dunida ku hoggaamiyaan oo aad soo tebisaan aqoonta, hal'abuurka, ganacsiga, dalxiiska, caafimaadka iwm, oo walaalleyaaloow waa tii Reerkii Dibedda qof u jiro ladnaan jiraye, ummad dayacan baad u maqantihiine, u damqada oo ha isku dirinina oo hakala dilinina oo Ilmo Xalaal baad tihiine dulucda hadalka eegoo, dadkiinna darxumada kala dirira.
وبالله التوفيق
Comments
Post a Comment