قال الله تعالي
لَّا خَيْرَ فِي كَثِيرٍ مِّن نَّجْوَاهُمْ إِلَّا مَنْ أَمَرَ بِصَدَقَةٍ أَوْ مَعْرُوفٍ أَوْ إِصْلَاحٍ بَيْنَ النَّاسِ ۚ
Laga billaabo heer dowladeed, illaa heer shakhsi, in loo hadlo si kal bannaan bilaa gabbasho ah weli ma aynaan gaarin. Khuraafaadka ku dhisan dhaqanka, diblumaasiyadda, xeeladaysiga iyo laba boglaynta, waxa uu keenay in natiijo guul leh laga gaaro isjiid-jiidka bulsho ee naga dhexeeya.
Raggu uma sheegtaan marwooyinkooda baahiyaha ay qabaan, dumarkuna sidoo kale. Taasu waxa ay keentay in qoysaskeennu burbur xooggan uu soo gaaro, iyada oo ninka lagu guubaabinayo in dumarka la bajaqiyo, dumarkana lagu guubaabiyo in ninka la xiniyo siibo. Qabiilladu iskuma caddeeyaan waxa ay kala tabanayaan, sida ay iska aaminsanyihiin, waxa ay isku qirsanyihiin iyo waxa aysan isu ogoleyn. Waana sababta aanooyinku aanay u joogsan oo marwalba qabiilladu gamta isku haya. Maamullada siyaasadeed iyo siyaasiyiintu runta isuma sheegaan, ninwalba damaca ku jira si aanan loo ogaan, intaas oo geed buu iskusoo jiidaa si uu ujeedkiisa qarsoon ugu hirgalo. Waana sababta beesha caalamka ah la'aanteed aynu u dhaqaaqi la'nahay, "ila meereyso" ayuu kusoo koobay ninkii Reer Soomaalilaan ee qeexay siyaasadda Soomaalida.
Si loo gaaro daawada, waxaa khasab ah in la ogaado xanuunka. Lamana ogaan karo xanuunka, inta wax lakala qarsanayo, la'isu mujaamalaynayo. Waxaa loo baahanyahay waxa la yiraahdo "Turxaan" oo ah dhaqan ay leeyihiin qoys kamid ah qoysaska Soomaaliyeed oo nin saaxiibkay ah uu ka dhashay, waxaana uu ii sheegay in qoyskoodu marka ay shirayaan lagu billaabo in qofwalba oo qoyska kamid ah oo qof walaalkii ah ay wax dhexmareen, tabashana uu dareemayo uu sheegto, si qofka wax laga tabanayo u ogaado khaladka uu geysto, kadibna uu ka raalli geliyo wixii uu ugeystay, arrintaasna ay tahay qodob muqaddas u ah qoyska si loo helo caafimaad iyo laab xaarnaan ka dhaxaysa dadkaa wada dhashay.
Bronnie Ware qoraaga buugga The Top Five Regrets of the Dying waxa ay qodobka 3aad ka dhigtay in ay kamid tahay walxaha dadku marka ay sii dhimanayaan ka shallaayaan in ay jeclaan lahayeen in ay yeeshaan karti ay dareenkooda iyo waxa ay qabaan ku cabbiraan. Soomaaliduna waxa ay ku maahmaahdaa "Nin aamusan hooyadii qadisay".
Waxa aan rejeynayaa in aad ila fahantay in aan baahi weyn u qabno gaaridda biseyl aan ku wada hadalno, taas oo la'aanteed curyaamisay geeddi socodka nolosheenna siyaasadeed iyo middeenna bulsho.
Marka xiga isku day in aad sidii hore ka duwan in aad ula hadashid cidda ay wax idinka dhexeeyaan, iskuna khasab in aad bareertid, waxa aad dareemeysidna in aad sheegtid, sidoo kale ku dhiirrigeli qofka kale in uu isna dareenkiisa cabbiro. Madal ballaaran haddii aad tagtidna u sheeg bulshada in marka hore loo baahanyahay "Turxaan" si loo gaaro daawada dhabta ah ee la wada doonayo.
وبالله التوفيق
Comments
Post a Comment