Kafeegii saakay aan cabbayey wuxuu aha bilaa sokor. Yeelkeede, waxa aan is lahaa indhaha ku shido, waayo waxaa ii tiil howl u baahan maskax furan iyo fir-fircooni. Aniga oo bowd ciid guduud la xaaqay oo la rusheeyey fadhiya, koobkaygiina isku muquuninaya, ayaa waxaa meeshii mar qura yimid odayaal bulaamaya. Oday kamid ah raggii meesha joogay, waxa uu sitay sigaar aanan wali la shidan, taleefoonna waa uu ku hadlayey. Inkasta oo aanan sheekadiisii si fiican u dhuuxin, misana dhagahayga waxaa kusoo duulay isaga oo qofka uu la hadlayo ku canaananaya sababta uu warkiisa u gaabiyey. Waxa aanna u fahmay in uu la hadlayo qolo warbaahinta ka shaqeysa oo wareysi ka qaadday ama munaasabad uu ka hadlay cod laga duubay oo la baahiyey aanan warkiisii la wada baahin. Cabbaar haddaan sii fadhiyey waxaa raggii meesha yimid hadalkooda ka fahmay in uu jiro shir beeleed, kaas oo looga arrinsanayey aayaha siyaasadeed ee beesha.
Meelaha noocaa ah, waxaa kasoo baxaya mawaaqif masiiri ah, kuwaas oo saameynaya bulsho dhan. Dadka tegeya goobaha noocaa ahna waxaa laga filayaa in ay yihiin dad garaadkoodu ka gudbay naftooda iyo baahiyohooda maaddiga ah iyo kuwa macnawiga ah. Waa runtaa oo haddii aad la yaabbantahay sida aan isu khaafinayo, aadna is leedahay waaqicu intaa waa ka kharaaryahay, misana waxa ay iga tahay in aan is xusuusinno dadka inoo arriminaya qaarkood in ay baahi fog qabaan, in ay cid kale wax taraanna aanan loo joogin.
Ka daali mayo in aan hadba dhinac kaa tuso haadaanta aan kusii baxsanayno, waxa aanna aaminsanahay in marwalba la'is xusuusiyo dhibta jirta ay keenayso in ay dadka soo karto, macquulna ay noqoto in xal loo raadiyo, ama ay dhacdo (ILAAHAY waxba kuma aha eh) in odaygii saakay uu qoraalkaan inta akhriyo, wax isku falo oo is waansado, ama dad kale oo goleyaalkaas ka qeyb gala ay tooshka ku shidaan odayaalka bukaanka ah ee daawada ka raadinaya in ay hadlaan oo warkooda meelahaa laga daawado.
Odaygii ay uga dheggentahay in uu TRENDING noqdo, waliba si joogto ah, waxa aan ku caawinaynaa in aan u furno YouTube, Facebook iyo Twitter, si uu halkaa uga tannaagoodo, warkiisana dadka uu u buko gaarsiiyo.
Comments
Post a Comment