Kaalay na tuki!

 "Qowm sharaf ku heley Islaamnimada ayeynu nahay. Haddii aan meel kale ka doonno, ILAAHAY waa na gumeynayaa."

~ Cumar Binu Khaddaab (Ilaahay haka raalli noqdee).

Galabtay makhribkii baan mawlac salaaddii noogu gashay. Markii la aqimay baa waxaa la isku tuur-tuuray cidda salaadda tujin lahayd. Ugu dambeyn oday lasoo khasbay baa safka saddexaad isaga oo caga jiidaya kasoo baxay oo salaaddii na tujiyey.

Galabtay iiguma horreyne, waa wax aan marwalba oo aan meel masaajid ka baxsan ay salaaddu iigu gashay, adna waad arki doontaa ee u fiirso.

Markii aynu yar-yareyn, masaajidku wuxuu ahaa meesha ugu fiican ee odayaasha wax galka ah isugu tagaan, qofka imaamka ahna waxa uu ahaa qofka odayaashu ka dambeeyaan (tujiya), hadalkiisana si tixgelin badan u dhegeysta (khudbada jimcaha). Walina dhankaa masjidka imaamka aad ayuu ugu maamuusanyahay jagadiisa, inkastoo waayahaan masaajidda laftoodii uu ka billowmay loollan kooxaysi ku salaysan.

Dhanka kale, waxaa taagan xilligii doorashooyinka siyaasadda dalka. Waxaana magaalooyinka waaweyn suran tabbeelleyaal ay ku dheggenyihiin murashixiin kala duwan oo isku fallisaya in ay dalka siyaasaddiisa waxka tujiyaan. "Cadaalad, Midnimo, Horumar, Hoggaan hufan", kaalay iska arag ashqaraarka meesha ka socda.

Waxa ay maraysaa in beelihii ku kala dhintaan kursiga siyaasiga ah, oo beelaha qaar ay billaabeen in ay samaystaan odayaal dhaqameedyo cusub oo lagu wiiqayo miisaanka odayaashii dhaqanka ee soojireenka ahaa, taas oo abuureysa khatar weyn oo ku aaddan wax wada qeybsiga ka dhexeeya dadka Soomaaliyeed.


Sababta keenaysa in hoggaanka salaadda la isku tuur-tuuro, kan siyaasadeedna la isku diriro ayaa la oran karaa midna dheeftiisa lama arko, midna waa la arkaa. Taas haddii aad si fog u sii fiirisid, qof Muslimnimo sheeganaya oo tukanaya, misana xil adduunyo oo eed leh, ammaano adag, culays badan, xalaasha ka fog, xaaraanta u dhow, xaqdarradu deris yihiin oo kaba qaadnimo, gaalo tuugsi, nin jecleysi, dan seeg, qoys dumis, balwad, laaluush, tumasho, qarax, dil, shirqool, bilaa ujeeddo oo dhami ay la daris tahay dadku isku buuranayo. Halka darajadii sharafta lahayd ee weyneyd ee ILAAHAY hortiisa in la'istaago wax lagu hoggaaminayey ay noqotay mid la'isku tuur-tuuro.

Ugu dambeyn, qofna calafkii loo qoray ka badsan maayo. Waxa dhab ahaan uu qofku leeyahayna waa intii uu Suubaneheennu (Nabadgelyo iyo Naxariis korkiisa ha ahaatee) uu kusoo koobay "Qofka ku waaberiista nabad, jirkiisuna u bed qabo, maalinkaasna quudkiisa haysta, waxa uu lamid yahay nin dunida dhan hantiyey". Aniga qoraalkan qoraya iyo adiga akhrinayaba intaas waannu wada haysannaa. Balse qofka Muslimka ah waxaa la gudboon in aanu sida gaalkii aanu u fekerin oo uu xusuusnaado in hor ILAAHAY la tegeyo, la'isna weydiinayo waxwalba oo aan kasbannay. 

وَسَيَعْلَمُ الَّذِينَ ظَلَمُوا أَيَّ مُنْقَلَبٍ يَنْقَلِبُونَ