Qormadaydii 100aad! Maxaan ka bartay?

At Garaad Tech Hub office

"Wixii la qoraa quruumo haree muxuu hadal qiimo leeyahay abwaan."

~ Aadan Af-Qallooc

 Waa been, haddii aad ka aaminsantahay in qoraalka uu u baahanyahay xog waaweynka ah, si aad qormooyin u samaysid. Keliya waxa aad u baahantahay in aad afkaartaada iyo falcelinnadaada qoraal ka samaysid. Tusaale, haddii aad saakay suuqa kasoo adeegatay, waxaa dhacday in aad meherado soo martay. Qoraal waxa aad ka samayn kartaa dukaanka aad mooska kasoo gadatay. "Eedo Batuulo saakay way qoslaysay markii aan u galay, waxaa u saarnaa cillaan cusub, waxa ayna xirnayd dhar qurxoon. Waxa aan is iri malaha ma odaygeedii baa u imanaya. Si fiican bay iisoo dhaweysay, mooskana waxa ay iigu dartay hal xabbo oo suubis ah. Waxa ayna i tiri berrina ii imoow waan kuugu darayaa. Isbuucii hore mar aan moos ka iibsanayey, xabbad moos ah oo bolol ah baan iga baddal ku iri, wayna igu xanaaqday". Waa intaa un, u fiirso waxa hareerahaaga ka dhacaya, kadibna u beddel qoraal.

Waxaa laga yaabaa in aad ku dooddid, maxaa ka macno ah in aan wax ka qoro aniga iyo Eeddo Batuulo sheekada na dhex marta, dadka wakhtigooda waxaas ugama dhumin karo. Iga dhaaf. Maxuma! Si aad sheeko xiise leh u qortid, waxa aad cabbir ka qaadataa oraahdan "Mukulaal baa booskeedii fariisatay sheeko kuma jirto, balse Mukulaal baa booskii Eyga fariisatay. Sheekaa ku jirta". Qoraalkaaga ku aaddi mawqif culus oo adiga ama cid kale ku dhacay. Isku day in aad sida wax u dheceen xog fiican ka heshid, markaa waxa aad ku dartaa falaanqeyn ku dhisan fekerkaaga ku aaddan sida wax u dheceen.

Wax kasta oo aynu qorayno, waxaa larabaa in ay arrimahaan ku suntan yihiin:

1. Xog ururin mug leh oo ku aaddan wax aannu wax ka qorayno.
2. Hab qoraalka aasaasiyaadkiisa oo aan iska soo dhisno (Buugga Samiik ee Shaqal Bile) 
3. Adeegsiga suugaan, maahmaah iwm
4. Ku billaabidda hadal soo jiita akhristaha
5. Cabbirka sida ay kuula muuqato waxa aad wax ka qoraysid (Lama huraan weeye qodobkan)
6. Farriin aad doonaysid in akhristuhu ka dhaxlo qoraalkaaga
7. Ku larid cilmi baarisyo iyo xogo mawduuca la hal maala.
8. Xornimo u hadal. Ku mitid in aad wax u cabbirtid sida dhabta u dhow, waayo waxa aad qoreysid berri ka maalin waxa ay noqon karaan qodobbo taariikh ahaan loo cuskado. 

Ugu dambeyn, qoraalku waa sida ubadkaaga weligii jiraya, adiga ayeyna kaa go'daa nooca ubad ee aadnuhu kugu aqoonsan doono.

بِسْمِ اللَّهِ الرَّحْمَنِ الرَّحِيمِ. ن وَالْقَلَمِ وَمَا يَسْطُرُونَ