2003-dii aniga oo de'yar, maalin roob da'ay oo jidku biyo gooyeen, ayaa waxaa deegaanka Heema iyo Cagaaran dhexdooda nagusoo maray dad la yiri waxaa lagasoo raafay Woqooyi-Galbeed (Soomaalilaan) gaar ahaan magaalooyinka Hargeysa, Burco iyo Berbera. Inta aan ka xusuusto, dadkaasi waxaa ka muuqday diyaar garow la'aan, waxaana mooddaa sida dad si sharci darro ah dal kale ku dhuumaaleysanayey oo ugu dambeyntii lasoo qabtay.
18 sano kadib, waxaa mar kale isla dadkii ayaa waxaa laga soo raafay isla Woqooyi-Galbeed (Soomaalilaan) gaar ahaan magaalada Laascaanood. Dadkaa iyaga ah ee koonfurta Soomaaliya ka yimid, waxaa ay eersadeen in ay yihiin dad dedaal badan oo deg-deg uga soo dhex muuqda suuqyada ganacsiga. Mr. Xareed oo ah aqoonyahan si xeeldheer uga faallooda arrimaha bulshada, ayaa yiri "Aniga iga qor, dadkaan Reer Koonfurka ah mustaqbalka iyagaa Soomaaliya qabsan doona. Eeg, meelwalba oo lagasoo raafo, waxaa lagu eedeyaa in ay suuqyada qabsadeen."
Raafka lagula kacayo dadkaas Soomaaliyeed, ma aha mid ku kooban Soomaalilaan, balse taas waxaa la wadaaga Puntland oo iyana raaf kaa lamid ah kula kacday dadka Reer Koonfurka ah dabayaaqadii sannadkii 2016, gaar ahaan magaalada Boosaaso.
Mr. Xareed oo falaanqeyntiisa sii wata ayaa yiri "Dadka Reer Koonfurka ah waxa ay isku darsadeen dhaqan adag oo diintu sal u tahay, howl karnimo iyo dedaal ay geliyaan ganacsiga iyo hormuarka. Waxa aan xusuustaa aqoonyahan Dr. Abukar-Khalifa oo hayb ahaan kasoo jeeda Koonfurta Soomaaliya ayaa muxaadaro waxa uu ku qabanayey magaalada Boosaaso. Waxa aan xusuustaa goobtii lagu qabanayey inta buux-dhaaftay ayey dadku hadalka aqoonyahanka daaqadda ka qoranayeen. Dadka sidaa u heellan waa isla dadka Koonfurta Soomaaliya kasoo jeeda. Waxa aan aad ula cajabay aqoonta iyo mugga Dr-ku xambaarsanyahay."
Dhanka kale, Mr. Sharmarke oo isna ah aqoonyahan Soomaaliyeed oo falaanqeynta ka qeyb ahaa, ayaa yiri "Dadka Reer Koonfurka ah hadda sidii hore ma aha oo deegaankoodu waa xasilloonyahay, waxaana dheer in ay leeyihiin Maamul-Goboleed heer Federal ah, taas oo meesha ka saareysa in dadkaasi ay meel cidlo ah ku noqonayaan."
Dhanka kale, dadka eedeeya Reer Koonfurka ayaa ku andocoonaya in ay deegaannada kale ka samayn wax ku darsi, balse ay xitaa waxyaabaha daruuriyaadka ah isla dadkooda ay ka iibsadaan oo shilinku aanu dhaafin.
Ugu dambeyn, waxaa muuqata in dadka Reer Koonfurka ah marwalba ay dedaal iyo horumar astaan u yihiin, taas oo dadka qaar ku abuurta walaac ay ka qabaan in ay marti ku noqdaan isla deegaannadoodii. Waxaana shaki la'aan ah in Dadka Reer Koonfurka ah meel walba oo ay tagaan ay ka samaynayaan dhaq-dhaqaaq horumarineed oo aanan la dhayalsan karin.
Comments
Post a Comment