SOMALILAND KA EEG 6 DHINAC

Sawir Google Images

 

"Sida uu u fekero waxa aad u malaynsaa 6 qof oo hal miis wada fadhiya, ciyaarayana Chess. Waxa uu awood u leeyahay in uu arko sida lixdaa qof u arkaan degidda saxda ah ay tahay in ay degaan." Sidaa waxaa yiri Ray Dalio oo ah ganacsade Mareykan ah isaga oo ka warramaya saaxiibkii Henry Kissinger, wasiirkii arrimaha dibedda Mareykanka xilligii Richard Nixon 1973 - 1977. Waxaana la dhahaa waa macallinka dejiya siyaasadda arrimaha dibedda dalka Mareykanka

Haddaba innaga oo isku deyeyna sida Kissinger in aan wax u eegno, qadiyadda aqoonsiga Somaliland aan ka eegno dhinacyo kala duwan.

Dhinaca 1aad (Dadka Reer Somaliland)

Intii uu caabuqa Covid-19 jiray, waxaa is bedel ku dhacay dunida oo dhan, dad badan oo shaqeyn jirayna waxa ay waayeen shaqooyinkoodii, taas oo kalliftay in 2 sano ku dhawaad dadku ay la qabsadeen qaab nololeed cusub oo abuuray fursado shaqo oo cusub, kuwaas oo dakhli ahaan qancisay dadkii, shaqo ahaanna uga nafis badnaatay, waxa ayna keentay in dalalka qaar sida Mareykanka la waayey wax shaqeeya oo uu soo shaac-baxay halku dhigga "The Great Resignation".

Haddaba dadka Reer Somaliland oo u badan dhallinyaro, waxa ay 30 sano ku hanaqaadeen dowladnimo ay tiir-dhexaad u tahay goonni isu taag ka dhan ah Soomaaliya inteeda kale. Aad iyo aad bayna caqabad u tahay in qof jiritaankiisaba aaminsanaa in uu qaran madax-bannaan yahay in laga dhaadhiciyo, kaalay oo dalkaan baad kamid tahay ee liq.

Dhinaca 2aad (Dadka Soomaaliya)

Calanka Soomaaliya oo dhexbartanka ay u taal xiddigta shanta gees leh, waxa ay uga dhigantahay 5ta Soomaaliyeed oo ay ku jiraan Soomaali Galbeed iyo NFD. Qofka ay halkaa u joogto, waxa uu taaganyahay war anigaaba wax iga maqanyihiine, sidee baad dhulkii yaraa ee 7-da ahaa oo caalamku ii aqoonsanyahay u aqbali karaa qeyb halagaa goosto. Dhinacaanna marka la eego waa waaqic jira oo cuskanaya qodobbo aanan la inkiri karin. Intaana waxaa dheer in uu ku doodayo in siyaasadda Soomaaliya ay jiraan dad ku metela Woqooyiga Soomaaliya (Somaliland) oo ayba yihiin dad ku saamigooda siyaasadeed iyo kooda dhaqaaleba hela.

Dhinaca 3aad (Dowladaha Deriska ah - Ethiopia/Kenya)

Kadib isjiiridda dhexmartay Djibouti iyo Ethiopia, Berbera waxa ay ahayd Plan B-ga Itoobiyaanka u ah halka ay neefta ka qaadanayaan, waxaana jirta in ay ku khasbanyihiin aqoonsi tiiro gaaban in ay u muujiyaan Somaliland, si ay hawsan ugu cabburmin mandiqadda, waxaana maalmahaan muuqda waji cusub oo soo dhaweyn ah oo Itoobiyaanku u muujinayaan Somaliland. Halka Kenya ay Somaliland u aragto warqad siyaasadeed oo ay culaysk ku saarto Soomaaliya.

Dhinaca 4aad (Dowladaha Carabta Emirates/Saudi Arabia)

Imaaraadku waxa uu dekedda Berbera ku sameeyey ballaarin, halka uu gegideedana horumariyey, waxaana loo fasiri karaa in ay ku ilaashanayaan saameyntooda ku aaddan Badda Cas iyo Baabul Mandab. Halka Sucuudigu ay sheegeen in ay aqoonsadeen Passport-ka Somaliland xilligii uu socday cunaqabateyntii ay dowladaha gacanku saareen Qatar.

 

 

Dhinaca 5aad (Dowladda Ingiriiska)

 

Billowgii 2020 ayuu Ingiriisku ka baxay Midowga Yurub. Soomaaliya marka la eego waa deeq-bixiyaha 2aad, waxa ayna u arkaan in ay tahay dal amniga qowmiga si weyn strategy ahaan ahmiyad ugu fadhiya. Isbedellada mandiqadda ka socda, awoodaha soo baxaya sida Shiinayska iyo Turkiga waxa ay u baahantahay in aynu fahanno sida Ingiriisku u arko danihiisii ku aaddanaa Soomaaliya, maadaama ay awoodaha cusub ay xiriirro wajiyo kala duwan la samaynayeen Soomaaliya sanadihii u dambeeyey.

 

 

Dhinaca 6aad (Mustaqbalka Soomaaliya)

 

Burburkii kadib, guud ahaan Soomaaliya oo ay ku jirto Somaliland, waxaa ka jiray xasillooni iyo horumar kala duwan oo ku aaddan dhanka dowladnimada, dhaqaalaha, tiknolojiyadda, waxaana la filayaa in horumarkaas uu sii lixaadsado. Haddaba waxaa is weydiin mudan, maxay tahay aragtida strategy-yadeed ee ugu habboon oo lagu xaqiijin karo in sida ugu habboon looga faa’iideysto fursadaha maantay ina horyaal ee isugu jira saaxiibbada doonaya in ay nagala qeyb qaataan dib u hana qaadka, dowlad wanaagga iyo sida aannu isu waafajin lahayn danohooda in ay u fulaan iyaga oo aanan innaga daneheenna iyo jiritaankeennaba galaafanayn. Kulli waxa ay u baahanyihiin aragtiyo xor ah oo cilmiyeysan, una baahan in si xeel dheer looga fekero.

 

Ugu dambeyn walaalahaya Somaliland oo mararka qaar ku dooda “Khalad dhacay baannu dib ka saxaynaa” ayaan imika leeyahay “Khalad iyo saxba waxa ay tahay sidii aynu horay go’aankeeda isula qaadannay, aynu imikana uga wada tashanno mustaqbalkeenna iyo kan ubadkeenna. Innaga wixii dhacay wax ka baranayna, waxa taaganna xal u raadinayna, waxa iman doonana qorshe u degsan doonna.”