Skip to main content

Puntland 24

 



PUNTLAND 24

(Tagto, Taagan iyo Timaaddo)


Waxa ay ahayd isku day ka yimid bulsho daallan oo duruuf adag, burbur iyo colaad sokeeye kasoo doogay, waxa ayna ka fekerayeen in dalka iyo dadkaba loo sameeyo saldhig looga duulo xal u helidda ummaddan bilaa garab ah ee sokeeyeheeda iyo shisheeyeheeduba isu sida u daawanayaan. Saldhiggaas waxa uu ahaa mid qofkii raba in uu ka howlgalo diyaar u ah in uu naf iyo maalba u huro, qodobkaas oo dadka ay ku adkaa, balse markaa intii joogtay ee dal iyo dadba lex jeclo ay ka haysay, waxa uu u ahaa salaad loo aqimay. Wax badan oo is jiid-jiid ah kuma ay qaadan dhismaha maamulka Puntland, waxa uuna lamid ahaa Masjidkii Nebiga NNKH ee uu Madiina ka dhisay durba markii uu tagay.


Muddo shan sano ah waxaa loo ruqaansaday gudashada waajibkii Qaran ee ahaa in la isla doono dal iyo dad kala irdhoobay oo ay dhex susumayeen halaqyo dhiiggu qaboojiyo, waxaana taas loo hoos galay ciddii wax laga heli karay — xitaa haddii ay hoosta sakiimo ku wateen, waxaana la isla raadiyey Soomaali oo dhan, iyada oo xaalku ahaa "War bal isu kaaya keena, aan tashannee." Dad kala qaloonaya lama ahayne, si sahlan baa la isu fahmay, waxaana loo dhaqaaqay in dowladnimada saldhiggeedii dib loo qotomiyo, iyada oo ay marwalba jirtay "Yool walba inta uu le'egyahay baa dhibtiisuna le'egtahay."



Maanta Soomaaliya waxaa ka jira nooc dimuquraadiyad ah oo lagu heshiis yahay oo nooceeda Afrika guud ahaan, gaar ahaan gobolka aan naal la dhihi karo waa wax lagu faani karo, iyada oo dowladnimadeenna jilicsan iyo hiil la'aanta haysata, misana in ay siyaaddo mooyee, nuqsaani ka dheertahay, waxa laga hadlayo maanta uu yahay wax la horumariyo oo lasii bilo ee aanu ahayn wax meel sagxad ah laga billaabayo.



Puntland haddii aan u soo laabto, iyaduna waxaa ay qeyb ka ahayd kasoo kabashada burburkii, waxaana maamul walba oo imanayey uu xoogga saarayey hadba halkii daran, waxa naga maqanna ay tahay wax aan innagu iska hagrannay ee aanu ahayn  musiibo samada la inooga soo diray. Sida lagu yiqiin ilbaxnimooyinkana waxaa isbedeleyey jiilashii xambaarsanaa waxa lasoo maray iyo kuwa ku hanaqaaday adduunkaan isku qoofalan. (Caaway 4G anoo isticmaalaya baan qoraalkaan Boosaaso kasoo qorayaa. 24 sano ka hor Bacaadweyn baan guri Faynuus taal ku noolaa)



"Warqad cad lama tafatiri karo" Oraahdii  Jodi Picoult annaga oo ka duuleyn, Puntland wax fiican oo si fiican loo sixi karo baa yaal. Waana kabiirka hannaanka Federalismka ee hadda heshiiska lagu yahay. Waajibka cusub ee inoo yaal baa ah in aannu tusaale u noqonno wixii aan Soomaali u horseednay. Shacab iyo madaxba rabitaankeenna oo mideysan oo ah in Puntland mid ah, horumarsan, dadkeedu is jecelyahay, Soomaalina jecel in aan ka shaqeynno. Qof walba kaalin buu leeyahay, tiisa oo iska tiiriyo baa nagu filan. 



Puntland waa hooyo, hooyana waa lama huraan.


Comments

Post a Comment

Popular posts from this blog

Hardanka Puntland: Ballaarinta saamileyda siyaasadda iyo arki jire doon

  Inkastoo aanan ogeyn waxa u qarsoon saaxiibbadii shalay/cadowga maanta, misana waxa aan isku dayeynaa in aan akhrinno doodaha miiska saaran, si aan u fahanno waxa kicinka keenay. Tan iyo dhaqaajintii nidaamka axsaabta Puntland, waxaa soo noolaanayey himiladii Reer Puntland ay ka qabeen in dadku codkooda ku doortaan cidda ku meteleysa goleyaasha siyaasadda. Waxa aynnu wada xusuusannaa sida dadku usoo ajiibeen saddexdii degmo ee lagu billaabay nidaamka. Inkastoo haka uu galay dhammaystirka qabsoomidda doorashooyinka degmooyinkii kale ee Puntland, misana dadku waxa ay muujiyeen rabitaan aanan la dhayalsan karin, taas oo aynu wada arkeynay sida dadku u codeyneyeen oo kormeerayaalkii Caalamiga ahaa ay qireen in dadkaanu yihiin kuwo aad mooddo in ay weligood wax dooran jireen. Casharraddii quruxda badnaa ee aynu ka barannay waxaa kamid ahaa murashixiinta ururrada oo wareegaya xaafadaha, qaarkoodna ayba wateen warbaahin soo tebinaysa codsiyada ay bulshada ku weydiisanayeen in ay codkooda si
Post a Comment
Read more

Waligaa ma isla fariisatay?

  Imta meel gaar ah tagtay, shubatay shaah ama cabitaan aad jeceshahay, mala sheekeysatay naftaada? Waa caadada nafta marka ay cidlooto in ceebeheeda iyo gaabiskeeda ay kusoo deg-degaane, inta dhagaha ka laabatay maskaxda maku jiheysatay wixii laandheerenimo ahayd oo aad qeyb kasoo noqotay amaba aad hoggaaminaysay? Wax weynba adigoo aanan raadin ma isasoo xusuusisay iyadoo dadku ay geesaha ka marayaan qof caawimaad u baahan aad keligaa isu xilqaantay gobanimada kaa buuxda awgeed. Ama maalin aad u hiillisay mid walaalkaa ah ama saaxiibkaa ah oo la caddibayo, sida malag lasoo diray inta cirka kasoo degtay, u fidisay gurmad uusan fileyn. Dagaalka nafeed ee qof waajahayo waa kan ka socda labadiisa dhegood dhexdooda (maskaxda), taas oo uu ku rabbeeyo in ay taageeraha u weyn noqoto, ayaa u sahleysa dhammaan dagaallada nololeed ee uu geli doono ka jabo keenideeda. Dadka aadanaha ka xusan ee wax un loogu hirto, waxa ay leeyihiin barbar dhan oo noloshooda kamid ah oo mugdi ah amaba uu gaabi
Post a Comment
Read more

Ka bad-badintii Puntland lagu aasaasay!

  Haddii aan soo koobo, Puntland laba lagu aasaasay. Dadkaa in ay salka dhigtaan iyo in dowladnimo Soomaaliyeed laga shaqeeyo. Marka aad sii eegtid xaal sida uu ahaa, qodobka 2aad ka badbadin baa lagu tilmaami karaa. Dad iyaguba soo qaxay oo wax badanna ku dhex labanyihiin in ay sidaa u fekeraan, waa waalli cas. Yeelkeede, la gaar dowladnimadii, maantana dalku waa isku aaddanyahay, waxa khaldanna waa nin howshiisii dayacay. Aasaaseyaashii  Puntland waxaa qeyb ka ahaa dhaqankii oo badankood ah rag dhaxal ku yimid baa inoo jooga. Sideedana dhaqan waxaa kaalintiisu tahay arrin qabiil la xiriirta. Mana rumeysni qodobkaa ka badbadinta aan kusoo tilmaamay in ay iyaga ka timid. Haatan, Puntland mar walba oo wax dowladnimada la xiriira adkaato, ma saxbaa in dhaqanka lasoo geliyo? Haddiiba lasoo geliyeyse, dhaqanku awood ma u leeyihiin in ay arrin siyaasi ah furdaamiyaan?  Anigu waxa aan qabaa malaha dhaqankeennu awooddaas. Eeg, waxa aan ka hadlayo waa awood, kama hadlayo odeyeyn iyo xaal mastu
Post a Comment
Read more