Qabyo

 Marka aad buug qoreysid, waxa ay ku macaantahay in uu qabyo kuusii yahay oo aad dhismihiisa iyo sii wadidiisa ka fekertid. Ciwaannadii kuu asteysnaa in ay ku sugayaan oo maadaama uu yahay sida bukaan meel kuu jiifa aad hadba fikraddii kugusoo dhacda aad ku daaweysid.

Dhanka kalena ay foojignaantaadu marwalba dhegta u taageyso wixii la halmaala buuggaa, jeer uu noqdo adduunkaaga oo dhan sheyga ugu weyn oo ku sugaya. Bal kawarran haddii aad tahay qof de'yar ah oo Soomaaliya jooga, aanna haysan qabyooyin aad himilo ka dhigato horumarintooda, kuwaas oo isugu jira kuwo dowladnimo, kuwo bulsho, kuwo ganacsi, kuwo aqooneed oo adiga iyo awoowgaagii geeljiraha ahaa farqiga idiin dhexeeyaa uu yahay in aad waxna akhrin kadhid, halkii uu bannaan ka seexan jirayna aad qol habeenkii u hoyatid, balse caqli ahaan aadan u diyaarsanayn waajihidda casrigan aad joogtid.

Saaxiibkay Sakariye oo aan ayaan dhexdaas ah wada shaqeynaynay baa subax annagoo quraac sugeyna halmar ay kasoo boodday "War annaga Mustaqbalkeennii meeyey?" Ima aadan fahmin baan filayaa. Aan kuu jilciyo. Eeg, waddankaan haddii meel wax u mari lahaayeen sida in uu marka hore haysto nidaam dowli ah oo adduunka la falgeli kara, shuruuc shaqeysa oo dadku kuwada qanacsanyihiin, nidaam waxbarasho aasaasiba ha iska ahaado. Waxa qaarkeen nolosha u huri lahaayeen in ay himilo ka dhigtaan horumarinta aasaaskaa aan haysanno.

Tusaale Xaliimo oo aad u jecel cilmi Nafsiga (Psychology) waxa ay dersi lahayd cilmigaa, kadibna magaalada waxa ay nooga furi lahayd goob lagula tacaalo dadka u baahan caawimaadda nafsiga ah, halkaasna waxaa suuqa ka bixi lahaa "Rusheeye, Ceejiye, Rusheeye ka yare (Jr) iyo Ceejiye ka yare (Jr)" Axmed oo xiiq ah, ayaa isna wuxuu baran lahaa qareenimo, kadibna dadka maxkamadaha isla aada ayuu ka shaqeysan lahaa, isla markaana waxa uu xallin lahaa howlaha tareesada loo adeegsado oo marka dambena isu bedela aanooyinka aanay cidna ka fakan.

Waa labo tusaale oo kamid ah kummaanaan shaqo oo iska bannaan. Waxa ugu muhiimsan baa ah in ay jirto wax aasaas ah oo wax lagu dul dhiso. Balse hadda waxa na haysta ayaa ah in aan rabno in aan wax dhisanno iyadoo aanay jirin wax asaas ah oo wax lagu dul dhiso. Waxaana intaa dheer in aan khasbayno oo indho adeyg iyo ismaqiiqid ku rabno in ay wax noogu hagaagaan.

30 Sano ayeynu madaxa la sii geleynaa, mana jirto cid leh "War bal u kaadiya aan is hubino in aan jid sax ah hayno iyo in kale" Sababta ma taqaan? Sidaa hadda aannu nahay ee hawtal hamagga ah baa qaar yar oo naga mid ah anfac ku qabaan, iyagii baa noogu xoog badan, noogu dhaqaale badan, noogu aqoon badan, wax ayna keentay in ay na ogoleysiiyaan ku dhex lugeynta mugdiyadan isa saaran.